|
|
Олдьу хоһоон
 |
|  | лдьу-солдьу оҥкуллаах
лордьу-туруору оҥуулаах
лоо-молоо көрүүлээх |
Олох-дьаһах олбохтоох
Олус элбэх олуйуулаах
Онно-манна тиксиилээх
Оҥоро-ситэрэ туруулаах
Оҥор-быһар олуктаах
Оҥой - соҥой туттуулаах
Отой бүтэй оҥоһуулаах
Олох-дьаһах туһунан
Омун-төлөн олбохтоох
Остуоруйабын сэргээҥ
Оҥой-соҥой көрүҥ
Олбохторго олоруҥ!
Хобдох-ибдэх хоһоонноох
Хомолто хобордоохтоох
Хомоҕой тыл хоргуннаах
Хооруйан этэр этиилээх
Хотуур сүгэ тутуурдаах
Хоту соҕуруу хомуллубут
Хоро омуктуу холоонноох
Хотон таһа ыырдаах
Хоп-сип хоболоох
Хойох хото хостоһуулаах
Хотон баран тэйиилээх
Хоонньуга киирэр эрийиилээх
Холбоон-илбээн эриһиилээх
Хоһооннорукпун истиҥ
Хоолдьуккутун хоҥкутуҥ
Хоттуустаргытын устуҥ!
ҮҺү-таамах үһүйээннээх
Үгүс элбэх таайыылаах
Үрүт үөһэ таарыйыылаах
Үтүмэх тыла хаарыйыылаах
Үмүрүтэ тарбааһыннаах
Үлүһүйэр үөрүүлээх
Үтүмэн элбэх үөгүүлээх
Үтүө дьону үөҕүүлээх
Үгүрү үгүс күөгүлээх
Үөлэн ылан сиэһиннээх
Үөр дьону үтүрүйүүлээх
Үөскэ киирэр үөтүүлээх
Үөмэ сылдьар үгэстээх
|
 |
| Үөннээх улахан истээх
Үс эрэ тиистээх
Үргүлдьү ыйыстар
Үһүктүүрүкпүн истиҥ
Үөрбүтэ буолаҥҥыт
Үөскүтүн таттарымаҥ
Үтүлүккүтүн устуҥ!
Мааны дьону матарыылаах
Мара дьону марбатыылаах
Мээнэ дьону мэрбэтиилээх
Тойот дьону тоҥсуйуулаах
Тохтоон биэрти тобуйуулаах
Хотут дьону хотутуулаах
Хотойор сирин хоһуйуулаах
Хоройор сири хомуруйуулаах
Кыыс аймаҕы кыбытыылаах
Кычыкылатар кыыбаҕалаах
Кымаахтыыр кыдьыктаах
Ыкса кэлбити ытырыылаах
Тэйэн биэрбэти тэбиилээх
Сыста түспүтү сырбатыылаах
Сыыла сылдьан сыллаһыылаах
Ойон биэрбэтэҕи охторуулаах
Ороҥҥо тийэ сосуһуулаах
Омун-төлөн олбохтоох
Олоҥхочооммун оройдооҥ
Ордук-хоһу санаабакка
Ол-бу диэкки көрбөккө
Олооччуларгытын устуҥ!
Билии-үөрэх быыһыгар
Биибэлиирэ тутуурдаах
Биирдэ эмэ үлэҕэ
Биллэр кэмчи тулуурдаах |
|
| Ийэ аҕа идэһэтинэн
Иитиллэр иэстээх
Иэмэх талах курдук
Имиллэ-хомулла охсор
Искуустубаннай аҥаардаах
Интэриниэтинэн ииригирэр
Инэстирээннэй тыллаах
Эриһиэҕин баҕардаҕына
Эрэстэрээннэй ырыалаах
Сэбэрэмиэннэй муодунай
Сэбилэниилээх муочунай
Уолугун иһигэр уе-лаах
Хармаанын аайы хаччылаах
Тыраҕаһын аайа тыһыынчалаах
Тыыннаах саҥа саха
Тыынарын этэрин эһиги
Тыыммакка олорон истиҥ,
Тыытыһарга бэлэмнэниҥ
Тыҥыраххытын хомунуҥ!
Кзрэхсээбэтэҕин кэпсиир
Кэлэйдэҕинэ эмиэ кэпсиир
Кэтэспэтэххэ кэлэр
Кэтэстэххэ кэлбэт
Кэдэрги таттарыылаах
Кэрдэн иһэр тэтимнээх
Кэлээт этэр - илэ этэр
Кэмэ суох ирдэбиллээх
Кэрээнэ суох кэмэлдьилээх
Кэмчилээбэт, хаһааммат
Кэлэр иһэр көлүөнэ
Кэлэҕэйдээбэт кэҕэтэ
Кэскиллэрдээх өрүөлэ
Кэтэмэҕэйдээбэккэ эрэ
Кэпсии кэҕийэ турарбын
Кэлиҥ истиҥ атастаар
Кэмчиэрийбитэ буолуомаҥ
Кэтиинчэлэргитин устуҥ!
Ыра санаа ыкка барда
Ыыра арда хайа барда
Ырыа тойук ыккы арда
Ыраах айан суолунан
Ыккый ойуур быыһынан
Ытыы соҥуу бара турда
Ырыынагым ыкпыт-түкпүт |
 |
| Ыран бүппүт үйэтэ
Ыга үктээн биэрбит
Ынтах-бэттэх ырыатын
Ынчык-хончук да буоллар
Ылыҥ истиҥ доҕоттоор
Ымаҥнаһа олорумаҥ
Ыыра арда баардаах
Ыы-дьаар сыттаах
Ыстааннаргытан устуҥ!
Сүүлүк албын сүрдээх
Сүүрбэ биирис үйэ
Сүүлэ киирэн сүгүннээбэт
Сүллүгэс саҕаны сүгээт
Сүүрэ сылдьан үгэннээбит
Сүүнэ дойду олоҕор
Сүрүнүн булбакка тиэтэйбит
Сүһүөҕэр турбакка иэдэйбит
Сүпсүлгэннээх ырыатын
Сүүрпүрүстэрдээх тойугун
Сүөргүлүү хайыы сатаамаҥ
Сүөлүргүү хайгыы барымаҥ
Сыана быһа сыаналаамаҥ
Сыаннан-арыыннан аҕаамаҥ
Сыалыһар быарыныы сымнааҥ
Сыылла сылдьан истиҥ
Сыалдьаларгытын устуҥ!
Туруу дьонун дьолун
Туруулаһар туһугар
Туоҕу эрэ туохтаары
Тугун эрэ суохтаары
Туруу бараан дойдуга |
|
| Турбутунан төрөөт
Тура-ойо сылдьар
Тугун да кэрэйбэт
Туохха да тиэтэйбэт
Туохтан да иэдэйбэт
Туохтаах эрэ киһигит
Туоҕу туох диирин
Тулуйаҥҥыт истиҥ,
Тупсан биэриҥ
Турукка киириҥ
Туоххут иһигэр
Туоххут эмитэ
Турар буоллаҕына
Турдар турдун
Туругура турдун
Турууһуккутун устуҥ!
Көнүл бара сатаабыт
Көтөх муҥунан көнньүөрбүт
Көнөн туран испит
Көмүс алмаас көтөллөөх
Көлүөнэлэргэ уурунуулаах
Көрдөр харахпыт дьүккэтэ
Көтүрдэр тииспит миилэтэ
Көмөлтөлөөх кэмнэрбит
Көҥөстөөх көмөлтөтө
Көөрөттө көҥнө тохтон
Көҥүлэ көстө көлөөҕүрэн
Көрдөрбүтүнэн көлбөҕүрэн
Көөчүктүү-көөчүктүү
Көҥө аньньан ааспытын
Көтө-дайа турбутун
Көкөттөрүм обургулар
Көтүрдэр тиистэрим
Көрдөр харахтарым
Көрбүккүт дуо эһиги?
Быраап сокуон былдьаһан
Былаах бэчээт оҥостуна
Быыппастыбыт кэммитин
Былаас сылаас иһин
Быыһас сыата сиэри
Быыбардаабыт сылларбытын
Быраат убай элбээн
Былаат-илээт солбуйан
Быыһын ардын холбуйан
Быычыгыраппакка хомуйан |
 |
| Быыһыыбыт диэн ааттаан
Быраҕан барбыттара абатын
Быыһаан ылыах ким баарый
Быһаарбыккыт дуо, эһиги?
Сиртэн хостонор баайы
Ситэн-хотон сиэри
Сиэри-туому умнан
Сиикэйгэ киллэрэн
Сирбит үтүөтүн ыллылар
Сиритэ хаһан сиидэлээн
Симэһиннэрин эмтилэр
Силгэ быччыҥ араара
Силиилэрин сиэтилэр
Сибилигин бу туран
Силигилээн барыахпытын
Симмитигэр да туһэн
Ситэн булан ылыахпытын
Ситэ-хото өйдөөбөппүн
Сибигинэһэ олорумаҥ
Сисигирэһэ күлүмэҥ
Сирэйгитин саптымаҥ!
Бэлэми кэтэһэ үөрэнэн
Бэйэ-бэйэбитин уксуһан
Бэттэх антах суксуруһан
Бэлэспит куура үөхсүһэн
Бэрт былдьаһа бөлүөхсүһэн |
|
| Бэйэбит киирэн биэрдибит
Бэдэри саһылга буккуйан
Бэйэ киэнин бутуйан
Бэлэхтээн кэбистибит
Биэрэн да бараммыт
Бэриммиппит түргэнин
Билиммэппит эбитин
Билигин бу этэбин.
Биллэхтэрим эһиги
Биһириигит дуо ону?
Тойон-хотун өттүбүт
Тот олоҕун оҥостунан
Тооторуһа хаамтылар
Тобох-ибэх хаалбытын
Тобоҕолоору мустан
Торҕон эһэлии сыыллан
Тоҕой аайы тоһуйалларын
Топпут аччыгы өйдөөбөтүн
Торҕон тоту өйөөбөтүн
Тоҕотун бэйэм билбэккэ
Тойуктарыкпар туойарбын.
Тоҕойуктарыам эһиги
Тобулан кулуҥ эрэ!
Кыһылы кыайан өрүттүбүт
Кыайар-хотор өттүбүт
Кыаммат-түгэммэт дьылҕатын
Кыра дьон кыһалҕатын
Кытыы сир кыамматын
Кыһын сайын кыһарҕанын
Кымаардаабат буолтарын
Кырамтатын ордорбуттарын
Кырыылаан кылбатан
Кылыһахтаах куоласпар
Кытыннара турбуппун
Кыҥаттарыам эһиги,
Кырбыаххыт да буоллар,
Кыайан отой өйдөөбөппүн!
Үөһэттэн салаллан
Үөдэнтэн үөрүүлэнэн
Үөҕүллэн үүрүллэр
Үөрбэҕэ үөлүллэр
Үтүрүллэр хабырыллар
Үйэлэрдээх эбиппитин
Үүнэр кэлэр үйэҕэ |
|
| Үөрэх буолбатаҕын
Үһүктэрбэр киллэрэн
Үлүһүйэн эрэрим
Үчүгэйин куһаҕанын
Үөҕүөххүт да буоллар
Үөтэн ситэн өйдөөбөтүм!.
Улуустарбытын ууратар
Уураахтар иһэллэр
Өрөспүүбүлүкэни өһөрөр
Өйдөбүллэр үөскээтилэр
Уобаласка буоласка
Уолдьаһыахпыт буоллаҕа
Холуонньаҕа хомуллан
Холбоһуохпут сыттаҕа
Маска олорор кубаны
Мааныларга холооммут
Манньалыаҕа диэммит
Манаһыахпыт буоллаҕа
Оройуоммутугар төннөн
Олоруохпут турдаҕа
Ону эмиэ тоҕо
Олоҥхобор холбообуппун
Оройдоппокко турабын.
Иккилиирэ сүбэлээх
Игирэлиирэ төбөлөөх
Иллэнэн Түмэннэнэн
Иэҕиллибиппит баара
Бирисээгэлээх бирисидиэн
Биһиэхэ эмиэ баара
Бырта сыата буолбут
Былдьаһыктаах холдьоһуктаах
Барабыыталыстыба да баара
Онтубут суолтатын
Ордубут тобоҕун
Олоччу сотоорулар
Отуойкаҕа олордоорулар
Олоотоһоллорун туһунан
Оҥорон көрө олоҥхолоон
Ордон тупсан тахсыахпын
Ончу өйдөөбөппүн!
Ынчык тийбэт ыраахтан
Ыытыллыбыт ЫНКБД-ы
Ыннарааттан ЫМЧыС
Ыҥырыллыбыт ЫМБД-ы |
|
| 
Боломуочунай борукуруор
Чолнуочунай чонуобунньук
Чинэйбит чиниэбинньик
Куруубай кураатар
Курубаһыт араатар
Анарааттан аналлаах
Аллаах аппараат
Бэриккэ бэлэһирэр
Бэлэм айах бэлиитикэ
Эккирии сылдьар
Эккэһит экэниэмикэ.
Үлэтэ хамнаһа суох
Үөрэх үөһэ үөрэх
Онтон да атын Айаххытын атыҥ!
Бырааппытын барытын
Былдьаан ылан бараннар
Бэйэҕитин салайынан
Бэлэскитин бүөлэниҥ,
Көҥүлбүтүн күөмчүлээт
Көрүнүҥ-истиниҥ
Баайбытын үллэстээт
Баһылааҥ барҕарыҥ
Диэхтэрэ турдаҕа,
Диэбиттэрэ даҕаны.
Итэҕэли эрэли
Иитин-саҕатын
Иилэн ыланнар
Иисуска иитиллэргэ
Ийэ итэҕэли умнарга |
 |
| Ийэ тылы тумнарга
Иһэр инники көлүөнэҕэ
Иитиллэр айа кэриэтэ
Иитэр-такайар үлэҕэ
Иниструукция оҥоһуллан
Иниститууттарга тарҕанна.
Ыччатын ыратын
Ыһыктан кэбиспит
Эдэрин эйэтин
Эһэн кэбиспит
«Эллэй» биибэни
Эмсэх туттарбыт
Кэнчээритин кэскилин
Кэбийиэх курдук
«Кэскил» арыгыннан
Кэһиилээбит, кэбилээбит
«Сайсары» буокканнан
Санаатын сайҕаабыт
Саһыл саҕалаах
Сатаҕай салалта
Сарсыҥҥыны сатыырын
Саҥастарыам эһиги,
Санаабыккыт дуо?
Быыбартан быыбарга
Бырда быста бырдаҥхалаһар
Бытыылкалаах орохпут
Быыппастар олохпут
Бырыһыана кыччаан
Быччаххайа элбээн
Былаастан тэйэн
Былаһынан атан
Быыһанарын быыһамматын
Бырааттарыам эһиги,
Бырыһыаннаан этиҥ эрэ?
Улуу убайдарбыт
Уһун көнө өһүөлээхтэрбит
Уйгулаах олохпут
Уталыйбат укулаатын
Умна тэмнэ иликкитинэ
Ууран тутан биэрэллэрин
Улугура илик буоллаххытына
Убайдарым обургулар,
Ууран кулуҥ эрэ!
Таралыйа сытаммыт |
|
| Таптаһа-таптаһа
Таалалыыр олохпут
Талбытынан дьаһанар
Тааҕа таах салайынар
Таһаарыылаахтык үлэлиир
Табаарынай олбохпут
Таабырынын таайтарыытын
Таайдарым эрэ буолларгыт
Таба этиҥ эрэ!
Үлэ-хамнас үгэнниир,
Үүт-сүөгэй үрүлүйэр,
Үөрэх-билии чэпчиир,
Үп- хаччы үөтэлиир,
Үрүҥ-маҕан субаланар,
Үөрэ-көтө дьоллонор,
Үөскүү- төрүү үксүүр
Үйэлэрикпит үүнэрин
Үөмэн тийэн кэлэрин
Үгүс хаары уулларбыт
Үрүҥ баттах оҕонньоттор
Үөтэн кулуҥ эрэ!
Дьокуут туһа дьокутааттар,
Саха туһа салайааччылар,
Бар дьон баһылыктара,
Тоҥ дойду тойотторо,
Кэлии омук кэрэлэрэ
Кэлэҕэйдээбэт кэҕэлэрэ
Кэлиҥ эрэ кэккэлэһиҥ
Кэпсээннэрикпин кэрэһилээҥ,
Кэскиллэрбин түстээҥ!
Эһиги да бааргыт |
 |
| 
Этэр тыынар тыллааххыт
Биһи да баарбыт
Истигэн кулгаахтаахпыт
Иннинэн сирэйдээхпит
Иэгэйэр икки атахтаахпыт
Ийэ дойдулаахпыт
Аҕа халлааннаахпыт'
Айылҕа дьүөрэтэ
Айыы хаан аймаҕа
Аналын булуохтаах
Дьылҕа хаан ыйааҕа
Хайаан да туолуохтаах!
Биһиэнинэн буолуохтаах!
Уххан
2003 с. 
|
|
Category: Санаа буолардаах, буолбаттах | Added by: uhhan (2007-10-14)
| Author: Уххан  
|
| Views: 5913
| Rating: 5.0/3 |
|
|
|
| Ааҕыылар |
Баар бары (online): 6 Ыалдьыттар (гостей): 6 Кыттааччылар (пользователей): 0 |
|
