Бу сир талбата (меню)
Catalog categories
Норуот эмчиттэрэ [6]
Оһуохай [5]
Итэҕэл [27]
Саха биис уустара [150]
М.Тумус, П. Тараҕай, И. Сулус, В. Майаһа "Саха биис уустара" кинигэ
Олоҥхо [6]
Ыһыах [2]
Сиэр-туом [2]
Ойууннааһын [0]
Айыы үөрэҕэ [17]
Main » Articles » Итэҕэл » Айыы үөрэҕэ

Тэрис. "Барҕа алгыстра" 09
http://kut-sur.e-sakha.ru/
Билбэт тылларгын манна көрөөр: Э.К. Пекарскай тылдьыта

Барҕа алгыстара

9А1--57

Ытык эт алгыһа

Аан Айыы Тойон,
Бэттэх көрөн
Мичик гын!
Айхал!
1
Үрүҥ Айыы Тойон
Аартыга аһылыннын.
2
Ытык этим
Арылыннын.
3
Айыыларым саҥарбыттарын
Саҥарыым,
Иэйэхситтэрим эппиттэрин
Этиим.
5
Сүнньүм көннүн,
Сүргэм көтөҕүлүннүн.
6
Дьиҥи итэҕэйиим,
Кырдьыгы кылбатыым.
7
Самныбат саргыланыым,
Кэхтибэт кэскиллэниим.
8
Ырааҕы көрүүм,
Үйэлээҕи өйдүүм.
9
Эргэрбэт
Эрчимнээх буолуум.
Дом!

9А2--58

Көх алгыһа

Көх Айыы Тойон,
Бэттэх көрөн
Мичик гын!
Айхал!
1
Айыы саҥнаныым,
Күн көхтөнүүм.
2
Аҕа Айыыларым,
Дьээ диэтэхпинэ
Дьээ диэтиннэр.
3
Ийэ Иэйэхситтэрим,
Буо диэтэхпинэ
Буо диэтиннэр.
4
Тылым төбөтүгэр
Олордуннар,
Санаам тамаҕар
Сырыттыннар.
5
Тылбын тэһииннээтиннэр,
Саҥабын салайдыннар.
6
Сыыһабын көннөрдүннэр,
Алҕаспын араардыннар.
7
Күн утаҕын туттардыннар,
Сырдык суолу анаатыннар.
8
Атахпар үктэннэрдиннэр,
Сүһүөхпэр туруордуннар.
9
Сымнаҕас ытыстарыгар
Олортуннар.
Дом!

9А3--59

Алгыс алгыһа

Алгыс Айыы Тойон,
Бэттэх көрөн
Мичик гын!
Айхал!
1
Алгыс баһа
Арыылаах.
2
Ийэ куппар иҥмит
Ийэ алгыһым
Этэр тылбар киирдин.
3
Буор куппар олорор
Оҕо алгыһым
Тойукпар холбостун.
4
Эҕэрдэнэн эргиллиим,
Алгыһынан хайыһыым.
5
Үөрүүнү-көтүүнү
Олохтуум,
Оту-маһы
Көҕөрдүүм.
6
Сүбэни булуум,
Сүргэни көтөҕүүм.
7
Этэр тылым
Үүннээх-ыҥыырдаах буоллун.
8
Айыылар эппиттэрин курдук
Саҥарыым.
9
Күн санааланыым,
Сырдык суолланыым.
Дом!

9А4--60

Туом алгыһа

Туом Айыы Тойон,
Бэттэх көрөн
Мичик гын!
Айхал!
1
Алгыһынан суолланыым,
Туому толоруум.
2
Айылҕа эргиирин
Батыһыым,
Айыылар этиилэрин
Салгыым.
3
Өбүгэ үгэһин үтүктүүм,
Үтүө тылы үүннэриим.
4
Туомунан бааллыым,
Силигинэн ситимнэниим.
5
Көнө сүрүннэниим,
Көрсүө мэйиилэниим.
6
Оҥорорбун
Оҥорон иһиим,
Ылыммыппын
Ыпсаран иһиим.
7
Кэмигэр ситэриим,
Тоҕооһугар толоруум.
8
Төлкөнү төрүттүүм,
Кэскили кэҥэтиим.
9
Үрүҥ күн үтүөтүн тутуум.
Дом!

9А5--61

Майгы алгыһа

Майгы Айыы Тойон,
Бэттэх көрөн
Мичик гын!
Айхал!
1
Киһилии быһыыланыым,
Айыы майгыланыым.
2
Сыылба буолумуум,
Дааргытыйан биэримиим.
3
Түҥнэри сүргүөхтэнимиим,
Таҥнары хайыыланымыым.
4
Күҥҥэ хөхсүбүнэн
Эргиллимиим.
5
Үөрэн-көтөн,
Өрөйөн-чөрөйөн
Биэриим.
6
Оҥорорбун оҥоро туруум,
Үлэбин үмүрүтэн иһиим.
7
Күөх отунан хаамыым,
Күнү кытта аргыстаһыым.
8
Барҕа майгыланыым,
Айыы тыыннаныым.
9
Көнө өттүнэн сылдьыым,
Сөп өттүн тутуһуум.
Дом!

9А6--62

Сиэр алгыһа

Сиэр Айыы Тойон,
Бэттэх көрөн
Мичик гын!
Айхал!
1
Сиэри тутуһуум,
Силиги ситэриим.
2
Айыы айбытын
Батыһыым
Одун оҥорбутун
Утумнуум.
3
Аан дойду
Тэһиинин ылыым,
Күн сирин
Көнтөһүн тутуум.
4
Кутум тутулугун
Уларытымыым,
Сүрүм сүнньүн
Сүтэримиим.
5
Айыы дьонун кытта
Амарах буолуум,
Күн дьонун кытта
Көмүскэс буолуум.
6
Хараҕым сырдык буоллун,
Өйүм ыраас буоллун.
7
Чахчыга тирэниим,
Баары барҕардыым.
8
Кыһалҕаны кыайыым,
Тутурҕаны хотуум.
9
Алгыһым оройо
Аһаҕас буоллун.
Дом!

9А7--63

Дом алгыһа

Дом Айыы Тойон,
Бэттэх көрөн
Мичик гын!
Айхал!
1
Тулхадыйбат толору
Домноох буолуум.
2
Өбүгэлэрим
Үгүс үйэлэр тухары биэрбит
Өҥнөрүн үксэтиим.
3
Аймахтарым
Элбэх үйэлэр тухары биэрбит
Сыраларын салҕыым.
4
Утуммун быһымыым,
Ситиммин ситэриим.
5
Ааспыттан
Алгыһын тутуһуум,
Бүгүҥҥүбүн
Бүгүн оҥоруум.
6
Сарсыҥҥыны кытта
Бааллыым,
Кэлэри кытта
Ситимнэниим.
7
Айыы Суолунан сылдьыым,
Күн суолунан көстүүм.
8
Айыыны
Абааһы хоппута суох.
9
Тоҕус доммун толоруум!
Дом!

Category: Айыы үөрэҕэ | Added by: uhhan (2008-06-15)
Views: 5089 | Comments: 1 | Rating: 4.4/5 |
Total comments: 1
1 Halan  
Ытыктабыллаах Тэрис, табаарыһым Уххан, бу алгыстары атын сиргэ угуохха сөп дуо?

Only registered users can add comments.
[ Registration | Login ]
Login form
Көрдөө (поиск)
Атын сирдэр
Ааҕыылар

Баар бары (online): 1
Ыалдьыттар (гостей): 1
Кыттааччылар (пользователей): 0
Copyright Uhhan © 2024