Бу сир талбата (меню)
Catalog categories
Норуот эмчиттэрэ [6]
Оһуохай [5]
Итэҕэл [27]
Саха биис уустара [150]
М.Тумус, П. Тараҕай, И. Сулус, В. Майаһа "Саха биис уустара" кинигэ
Олоҥхо [6]
Ыһыах [2]
Сиэр-туом [2]
Ойууннааһын [0]
Айыы үөрэҕэ [17]
Main » Articles » Итэҕэл » Айыы үөрэҕэ

Тэрис. "Барҕа алгыстра" 08
Билбэт тылларгын манна көрөөр: Э.К. Пекарскай тылдьыта
 
 

Барҕа алгыстара

 
8А1--50

Дьоһун алгыһа

Аан Турук Айыы,
Бэттэх көрөн
Мичик гын!
Муундара!
1
Ыйааҕым аартыга аһылыннын,
Оҥоһуум суола тобулуннун.
2
Удьуордарым сыыспыттарын
Хатылаамыым,
Төрүттэрим таппыттарын
Тутуһуум.
3
Айылгым
Алгыһын салгыым,
Өбүгэм
Үтүөтүн үрдэтиим.
4
Төбөм иһигэр
Төлкөлөөх санаа
Төрүттэннин.
5
Баһым иһигэр
Бастыҥ санаа
Барҕардын.
6
Ыйаахпын ыллыктыым,
Оҥоһуубун тупсарыым
7
Итэҕэс этинимиим,
Быһаҕас туттумуум.
8
Бэйэ бодобун тардыныым,
Илэ өйбүн булуум.
9
Дьоһуннук сананыым,
Турукпун ыһыктымыым.
Дом!

8А2--51

Ортоку буолуу алгыһа 

Ортоку Айыы,
Бэттэх көрөн
Мичик гын!
Муундара!
1
Орто Дойду
Ортотугар буолуум.
2
Кутум-сүрүм
Күн сиригэр тохтоотун.
3
Уйулҕам хамсаабатын.
Санаам түспэтин.
4
Сылдьар сирим
Аан дойду киинэ буоллун.
5
Көлдьүнү кытта
Көтүмүүм,
Ардаҕы кытта
Ааһымыым.
6
Кутурукка соһуллумуум,
Кытыыга кыбыллымыым.
7
Киэҥ киэннэниим,
Көнө сүрүннэниим.
8
Түгэҕим көстүбэтин,
Улаҕам биллибэтин.
9
Тииттэн тирэниим,
Таастан тайаныым.
Дом!

8А3--52

Туруу буолуу алгыһа

Туруу Айыы,
Бэттэх көрөн
Мичик гын!
Муyндара!
1
Тургутуулары туоруур
Туруу туруктаныым.
2
Үөһэттэн киирээччилэргэ
Өйбүн сүүйтэримиим.
3
Аларааттан тахсааччыларга
Санаабын сайҕатымыым.
4
Ойоҕостон орооһооччуларга
Отуорбун оҕустарымыым.
5
Бэйэбин албыннанымыым,
Киммин сүтэримиим.
6
Минньигэс тылга
Дьиҥи биэримиим,
Албаҕа тылга
Кырдьыгы атастаһымыым.
7
Төбөм эргийбэтин,
Хараҕым иирбэтин.
8
Эрэх-турах буолуум,
Үрүк-түрүк сылдьыым.
9
Сылдьыбытым кырдьык буоллун,
Эппитим экчи буоллун.
Дом!

8А4--53

Бөҕөргүүр алгыс

Бөҕө Айыы,
Бэттэх көрөн
Мичик гын!
Муундара!
1
Туруу туруктаныым,
Бөҕө үүдэһиннэниим.
2
Кэлтэҕэй хамыйахтааҕы
Киллэримиим,
Такыр тарбахтааҕы
Чугаһытымыым.
3
Эриэн ыкка ситтэримиим,
Күөрт ыкка күөйтэримиим.
4
Туора муостааҕы тойорҕотумуум,
Атын саҥнааҕы ааҥнатымыым.
5
Иннибин быһа хаамтарымыым,
Кэннибин кэрбэтимиим.
6
Үтэн-анньан көрүүгэ бэринимиим,
Үктэтиигэ түбэһимиим.
7
Кыраттан кыйаханымыым,
Улахантан уолуйумуум.
8
Муора далай санаам
Муҥурдамматын.
9
Өйүм-санаам
Бөҕөх буоллун.
Дом!

8А5--54

Бигэ буолуу алгыһа

Бигэ Айыы,
Бэттэх көрөн
Мичик гын!
Муундара!
1
Бөҕө туруктаныым,
Бигэ айыыланыым.
2
Иһим иирбэтин,
Таһым дьалкыйбатын.
3
Ытык тылбын алдьатымыым,
Кэс тылбын кэһимиим.
4
Муорга-туорга
Буккулумуум.
Халы-мааргы
Буолумуум.
5
Ылбат-биэрбэт
Ыккардынан сылдьымыым.
6
Уу курдук
Уйманымыым.
7
Айыыларбын итэҕэйиим,
Иэйэхсиппэр эрэниим.
8
Отуорум хамсаабатын,
Туругум уларыйбатын.
9
Аар баҕах буолан
Барҕарыым.
Дом!

8А6--55

Ситэри буолар алгыс

Ситэри Айыы,
Бэттэх көрөн
Мичик гын!
Муундара!
1
Бигэ айыыланыым,
Силикпин ситэриим.
2
Туппуппун ыһыктымыым,
Булбуппун сүтэримиим.
3
Суолум оспотун,
Ыллыгым бүөлэммэтин.
4
Онно-манна
Улдьаарымыым,
Итиннэ-манна
Умньанымыым.
5
Тутах туттумуум,
Быстах быһыыланымыым,
6
Итэҕэскэ кииримиим,
Быһаҕаска быстымыым.
7
Сырыым
Ситиһиилээх буоллун,
Оҥорбутум
Хотуулаах буоллун.
8
Сөрү-сөп түбэһиим,
Бэри-бэрт түмүктэниим.
9
Ылыммыт дьарыкпын
Ситэрэн-хоторон иһиим.
Дом!

8А7--56

Толору буолар алгыс

Толору Айыы,
Бэттэх көрөн
Мичик гын!
Муундара!
1
Аналбын ситэриим,
Доммун толоруум.
2
Күнтэн быабын
Төлөрүтүмүүм,
Ыйтан быабын
Ыһыктымыым.
3
Уһун санаам
Кылгаабатын,
Киэҥ көхсүм
Кыараабатын.
4
Төлкө төргүүлэниим,
Ыра ындыыланыым.
5
Санаабытым
Алгыс хоту
Сайда турдун.
6
Толкуйдаабытым
Уруй хоту
Туола турдун.
7
Ылсыбытым быһаҕас хаалбатын,
Үлэм сиппэххэ хаалбатын.
8
Айбытым таба буоллун,
Оҥорбутум сөп буоллун.
9
Ситэри ыйаахтаныым,
Толору оҥорууланыым.
Дом!
 
Category: Айыы үөрэҕэ | Added by: uhhan (2008-06-15)
Views: 3110 | Rating: 5.0/1 |
Total comments: 0
Only registered users can add comments.
[ Registration | Login ]
Login form
Көрдөө (поиск)
Атын сирдэр
Ааҕыылар

Баар бары (online): 18
Ыалдьыттар (гостей): 18
Кыттааччылар (пользователей): 0
Copyright Uhhan © 2020