4А1--22
Түмүллүү алгыһа

Аан Хотой Айыы,
Бэттэх көрөн
Мичик гын!
Уруй!
1
Тоҕус холбооһуннаах
Хотой Айыым холбос.
2
Үрүҥ тыын буолан
Үллэр өрөһөбөр түмүлүн.
3
Этим-сииним эрчимнэннин,
Өйүм-санаам өркөннөннүн.
4
Төлкөнү төрүттүүр
Дьүккүөрүм төлөрүйбэтин,
Олох оҥостор
Мөккүөрүм мөлтөөбөтүн.
5
Мүлчүрүйбэт-мөлтөөбөт
Көхтөнүүм,
Умуллубат-уостубат
Уохтаныым.
6
Түмүллэр күүстэниим,
Эбиллэр сэниэлэниим.
7
Аан дойду аартыктаах,
Күн сирэ көҥдөй.
8
Алгыс тардыстаҕым буоллун,
Көҥүл көрдөстөҕүм буоллун.
9
Дыгын оҕото
Буолуум.
Дом!

4А2--23
Дьулуур алгыһа

Түрбүү Кынат,
Бэттэх көрөн
Мичик гын!
Уруй!
1
Төннүбэт санааланыым,
Сынтарыйбат дьулуурданыым.
2
Айыылартан ылбыт
Айар кыаҕым
Ахсаабатын.
3
Испэр иҥэрбит
Этиллиим диэлийдин,
Өрөһөбөр түммүт
Күүһүм көһүннүн.
4
Дьулуур буолан ситтин,
Сыра буолан сайдын.
5
Өйдөөбүт өйүм
Өһүлбэтин,
Саныыр санаам
Сайҕамматын.
6
Муннубунан
Мууһу тыырыым,
Сотобунан
Тымныыны солуум.
7
Ыарахантан сынтарыйымыым,
Моһолтон мунчуйумуум.
8
Кэннибинэн чугуйумуум,
Иннибинэн кэхтимиим.
9
Өйдөөбүт өйүн өһүлбэт
Үтүө киһи буолуум,
Эппит тылбын
Эргэрпэт
Эрэллээх киһи буолуум.
Дом!

4А3--24
Өн алгыһа

Ала Мондоҕой,
Бэттэх көрөн
Мичик гын!
Уруй!
1
Өһүллүбэт өннөнүүм,
Кэхтибэт кэскиллэниим.
2
Кыахпын билинэн дьаһаныым,
Кыаллар өттүн хамсатыым.
3
Күнү-дьылы
Көрүнньүккэ ыытымыым,
Сылы-кэми
Суолтата суох бараамыым.
4
Сииккэ сиэлимиим,
Хаарга хаамымыым.
5
Күн аайы
Кыайыыны төрүттүүм,
Сыл аайы
Ситиһиини ситимниим.
6
Өнүм үүнэ турдун,
Сылбам сайда турдун.
7
Үктэлбин тирэхтээн иһиим,
Хардыыбын хаҥатан иһиим,
8
Аара быстымыым,
Суол ортотугар хаалымыым.
9
Ылсыбыт дьыалым ыбыстын,
Туруоруммут соругум туоллун.
Дом!

4А4--25
Күүстээх санаа алгыһа

Алтан Сабарай,
Бэттэх көрөн
Мичик гын!
Уруй!
1
Эр санаа эҥэрдэстин,
Хорсун санаа хобостун.
2
Моһоллору туоруур
Кыахтаныым,
Буомчулары ааһар
Күүстэниим.
3
Ыарахан диэн чаҕыйымыым,
Кытаанах диэн ыксаамыым.
4
Саараҥнааһыны кыайар
Санааланыым,
Быһымахтары кыайар
Быһаарыыланыым.
5
Булгуруйбат модун
Дьулуурданыым,
Тулхадыйбат хорсун
Сүрэхтэниим.
6
Үлүгэрдээҕэр
Үрдээн биэриим,
Иэдээннээҕэр
Кэҥээн биэриим.
7
Элбэх киһи
Эрэйин саныым,
Үгүс киһи
Мүччүргэнин өйдүүм.
8
Сыппаан-сынтарыйан биэримиим,
Мөлтөөн-ахсаан хаалымыым.
9
Өйүм дьайҕа буоллун,
Санаам бөҕөх буоллун.
Дом!

4А5--26
Түмсүү алгыһа

Күн Эрили,
Бэттэх көрөн
Мичик гын!
Уруй!
1
Түмсүү төрүттэннин,
Ил эҥэрдэстин.
2
Өйбүнэн өйү
Үксэтиим,
Санаабынан санааны
Салгыым.
3
Киһи киһинэн олорор,
Саха саханан сылдьар.
4
Туораабыты тураах сиир,
Сылайбыты сарт сиир.
5
Аймах дьоммун кытта
Алгыспын холбуум.
Доҕор дьоммун кытта
Дьулуурбун түмүүм.
6
Сүүс киһилиин
Сүүспүттэн өйөһүүм,
Элбэх киһилиин
Эйэбин холбуум.
7
Олоҕу оҥоруум,
Үтүөнү үксэтиим.
8
Түмсүүнү
Түмүктүүр күүстэниим.
Холбоһууну
Холбуур кыахтаныым.
9
Киһи киһитэ буолан
Килэйиим.
Дом!

4А6--27
Тэрээһин алгыһа

Дьаҕыл Түөс,
Бэттэх көрөн
Мичик гын!
Уруй!
1
Тэрээһини ситэриим,
Дьаһалы толоруум.
2
Үрүҥ Айыы Тойон
Үүнүн-тэһиинин тутуум.
3
Ситими салгыым,
Быстаҕы холбуум.
4
Элбэх дьону кытта
Алтыһан
Алгыһы элбэтиим,
5
Үгүс дьону кытта
Өйөнсөн
Үтүөнү үксэтиим.
5
Биир бэйэм элбиим,
Соҕотох бэйэм үксүүм.
6
Киэҥи көрүүм,
Кэскили батыһыым.
7
Суолу бүөлээмиим,
Сүрү быһымыым.
8
Аналбын
Аралдьыйбакка
Толоруум.
9
Бэйэм суолбун
Кэҥэтэн
Айыы Суолун
Арыйан иһиим.
Дом!

4А7--28
Иллээх буолуу алгыһа