Барҕа алгыстара

3А1--15
Чэгиэн буолар алгыс.

Аан Дьөһөгөй,
Бэттэх көрөн
Мичик гын!
Хоруу!
1
Дьөһөгөй Аартыга
Тэлэлиннин,
Дорҕоон суол
Тобулуннун.
2
Ийэ сирим
Илгэтин иҥэриим,
Күнүм сирин
Көҕүн тутуһуум.
3
Элбэх сэниэни
Эҥсэн ылыым,
Үгүс сүрү
Өҥсөн сүлгүйүүм.
4
Толору быарданыым,
Ситэри силиилэниим.
5
Үрэллибэт үүдэһиннэниим,
Уйадыйбат уҥуохтаныым.
6
Быччыҥым
Быыппастар кыахтаннын,
Силгэм
Силбиир күүстэннин.
7
Өркөн өйдөнүүм,
Сайаҕас санааланыым,
8
Эстибэт сэниэлэниим,
Быстыбат бырдыланыым.
Дом!

3А2--16
Күүс алгыһа

Күүс Дьөһөгөй,
Бэттэх көрөн
Мичик гын!
Хоруу!
1
Өһүллүбэт күүстэниим,
Эстибэт сэниэлэниим.
2
Үгдэрийбэт
Үрүт күүстэниим,
Алларыйбат
Алын күүстэниим.
3
Тирэҕим хамсаабатын,
Сүһүөҕүм мөхсүбэтин.
4
Түргэн атахтаныым,
Сыыдам сырыыланыым.
5
Матайдар тостумуум,
Чырбайдар бастымыым.
6
Үөл талах курдук
Эриллиим,
Ыаммыт талах курдук
Имигэс буолуум.
7
Уҥмат
Уһун тыыннаныым,
Сынтарыйбат
Сындааһыннаныым.
8
Бэттибэт
Бигэ бииллэниим,
Өҕүллүбэт
Бөҕө өттүктэниим.
9
Ат бөҕө буолуум,
Кус быһый буолуум.
Дом!

3А3--17
Тулуур алгыһа

Тулуур Дьөһөгөй,
Бэттэх көрөн
Мичик гын!
Хоруу!
1
Булгуруйбат тулуурданыым,
Тостубат сүргэлэниим.
2
Тэппит атахпын
Кубулутумуум,
Үктэммит улуҥахпын
Уларытымыым.
3
Тымныы диэн чаҕыймыым,
Тоҥ диэн толлумуум.
4
Эрэйдээх диэн
Кэхтимиим,
Ыарахан диэн
Куттанымыым.
5
Саҕалаан баран
Ыһыктымыым,
Суол ортотугар
Туораамыым.
6
Тоҕоостоох кэми
Куоттарымыым,
Табыгастаах түгэни
Аһарымыым.
7
Уһун диэн уурайымыым,
Ыраах диэн ыксаамыым.
8
Үүнэри өйдүүм,
Сайдары сабаҕалыым.
9
Өһүллүбэт дьүккүөрдэниим,
Туруулаһар дьоҕурданыым.
Дом!

3А4--18
Албас алгыһа

Албас Дьөһөгөй,
Бэттэх көрөн
Мичик гын!
Хоруу!
1
Албаска алкыллыым,
Кубулҕахха уһуйуллуум.
2
Аҕыс уон аҕыс
Албастаныым,
Тоҕус уон тоҕус
Кубулҕаттаныым,
3
Үлэни
Өйдүүр буолуум,
Дьыаланы
Дьалайар буолуум.
4
Бары өттүнэн
Баардылыым,
Толору өттүнэн
Томооннуум.
5
Көрүүм кэҥээтин,
Билиим бигэргээтин.
6
Муннукка хаайтарымыым,
Эркиҥҥэ кэтиллимиим.
7
Араас өттүнэн өйдүүм,
Эгэлгэ өттүнэн киириим.
8
Билэр туһугар дьулуһуум,
Өйдүүр туһугар дьүккүһүүм.
9
Эрчиллэн
Эбии тэптэн иһиим,
Үөрэнэнэн
Өрө баран иһиим.
Дом!

3А5--19
Сатабыл алгыһа

Сатабыл Дьөһөгөй,
Бэттэх көрөн
Мичик гын!
Хоруу!
1
Сатабыллаах өйдөнүүм,
Дьолуолаахтык туттунуум.
2
Албаһынан аартыктаныым,
Ньыманан суолланыым.
3
Олохтоохтук быһаарыныым,
Кэскиллээхтик дьаһаныым.
4
Ылсыбыт үлэбин
Ыпсаран иһиим,
Туппут сорукпун
Толорон иһиим.
5
Айар өттүн тутуһуум,
Сайдар өттүн хамсатыым.
6
Оҥорон
Олохтоон иһииим,
Айан
Сайыннаран иһиим.
7
Муҥурбун булларымыым,
Мэнньиэбин биллэримиим.
8
Үлэни сатыым,
Дьыаланы баһылыым
9
Ньымса
Ньымаланыым,
Имигэс
Идэлэниим.
Дом!

3А6--20
Үлэ алгыһа

Күрүө Дьөһөгөй,
Бэттэх көрөн
Мичик гын!
Хоруу!
1
Үлэһит киһи
Үтүөтэ буолуум.
2
Үлэм түмүктээх буоллун,
Сырам ситиһиилээх буоллун.
3
Ситиһиибин
Чиҥэтэн иһиим,
Табыллыыбын
Бигэргэтэн иһиим.
4
Инникилээх өттүн хамсатыым,
Кэскиллээх өттүн кэҥэтиим,
5
Үйэлээх өттүн
Үксэтиим,
Утумнаах өттүн
Тутуһуум
6
Ыыппыт сырабын ытыктыым
Биэрбит көлөһүммүн өйдүүм.
7
Сыыһабын аҕыйатан иһиим,
Итэҕэспин кыччатан иһиим.
8
Туһа диэки туһаайыллыым,
Көдьүүс диэки сылдьыым.
9
Оҥорбут үлэм
Туругурдун,
Айбыт айымньым
Айхалланнын.
Дом!

3А7--21
Тойон (хотун) буолар алгыс