Барҕа алгыстара

2А1--8
Өҥсүйэр алгыс

Аан Иэйэхсит Хотун,
Бэттэх көрөн
Мичик гын!
Күөгэл-нусхал!
1
Айыыһыт суола арылыннын,
Иэйэхсит суола тэлэлиннин.
2
Аан дойдубар
Аһаҕас буолуум,
Күн сиригэр
Көҥдөй буолуум.
3
Аҕыс айыыһыттарым
Аргыстаһыҥ,
Сэттэ иэйэхситтэрим
Эҥэрдэһиҥ.
4
Аан дойдум
Алгыһын ылыым.
5
Орто дойдум
Уйгутун сомсуум.
6
Ийэ сирим
Илгэтин иҥэриниим.
7
Аһаабытым уох буоллун,
Сиэбитим сэниэ буоллун.
8
Амтан тубустун,
Өҥ- тала буоллун.
9
Иһим иҥэрсийдин,
Таһым ньалҕарыйдын.
Дом!

2А2--9
Айылҕа алгыһа

Иһэгэй Иэйэхсит,
Бэттэх көрөн
Мичик гын!
Күөгэл-нусхал!
1
Киһи от-мас
Сүрэ сүрдээх.
2
Салгын иччитэ,
Тыыммын уһат.
3
Уу иччитэ,
Испин-үөспүн өҥсүт.
4
Сир иччитэ,
Эппин-сииммин эрчимнээ.
5
Тыа иччитэ,
Уҥуохпун-иҥиэхпин кытаатыннар.
6
Уот иччитэ,
Уохта-күүстэ биэр.
7
Сири бааһырдымыым,
Оту-маһы алдьатымыым,
Ууну киртитимиим,
Тыынар-тыыннааҕы харыстыым.
8
От-мас иччилэрэ оҕолор
Уруйу суруйдуннар.
9
Күн өттүнэн сылдьыым,
Күөх отунан хаамыым.
Дом!

2А3--10
Кут алгыһа

Күн Иэйэхсит,
Бэттэх көрөн
Мичик гын!
Күөгэл-нусхал!
1
Ийэ кутум эҥэрдэстин,
Салгын кутум салыйбатын,
Буор кутум куоппатын.
2
Айыылартан кэлбит
Ийэ кутум
Ис кыаҕа арылыннын.
3
Сүргэбин көтөҕөр
Салгын кутум
Үрдүк буоллун.
4
Буор кутум
Бу буор сиргэ
Бигэтик олордун.
5
Түмүктэрим
Сөллөн истиннэр.
6
Ийэ киэлилэрим
Илгэлэнэ турдуннар.
7
Айыы тыынын кытта
Арахсыспат ситимнэниим.
8
Сүнньүм устун
Сүр сүүрэ турдун.
9
Эргэ эстэ турдун,
Саҥа сандааран истин.
Дом!

2А4--11
Күлүк алгыһа

Мичил Иэйэхсит,
Бэттэх көрөн
Мичик гын!
Күөгэл-нусхал!
1
Инники күлүгүм
Ибири билбэтин.
2
Ортоку күлүгүм
Очурга охсуллубатын.
3
Кэннэки күлүгүм
Кэбири көрбөтүн.
4
Ааспыт тоҕус үйэҕэ
Олоҕуруум.
5
Кэлэр тоҕус үйэни кытта
Баайыылаах буолуум.
6
Аныгы кэмҥэ
Айан-тутан сылдьыым.
7
Күлүгүм уһаатын,
Былытым чэпчээтин.
8
Уһун санааҕа олоҕуруум,
Быстах санааны кыайыым.
9
Турууласпытым
Томторго буоллун.
Дом!

2А5--12
Күрүө алгыһа

Налыгыр Иэйэхсит,
Бэттэх көрөн
Мичик гын!
Күөгэл-нусхал!
1
Үрүҥ Айыы Тойон,
Үрүҥ тыыҥҥын түһэрэн
Күрүөлүү тур.
2
Илин өттүбүттэн
Эҕэрдэ эҥэрдэстин.
3
Соҕуруу өттүбүттэн
Содуом охсубатын.
4
Арҕаа өттүбүттэн
Алдьархай киирбэтин.
5
Хоту өттүбүттэн
Ыарыы ыкпатын.
6
Күрүөм кэҥээтин,
Сүргэм үрдээтин.
7
Айыы алгыһынан
Арчыланыым,
Күн сүлгүөрүнэн
Көмүскэниим.
8
Көнчүөнү көтүрэн иһиим,
Сиби тэйитэн иһиим.
9
Айыы сырдыгынан
Сыдьаайыым.
Дом!

2А6--13
Чэпчиир алгыс

Күөгэл Иэйэхсит,
Бэттэх көрөн
Мичик гын!
Күөгэл-нусхал!
1
Өйүм-санаам
Үрүҥ былыт буолан
Үөһэттэн туттардын.
2
Куһаҕан санаа
Хоммотун,
Ыарахан санаа
Ыалласпатын.
3
Төттөрү санаа үөрдүспэтин,
Туора санаа булбатын.
4
Сырдыкка талаһыым,
Киэҥҥэ тахсыым.
6
Быһа этиилэри
Бысталаан иһиим,
Кырыыс тыллары
Кыйдаан иһиим.
7
Сыта сыҥсаар буолумуум,
Хоно хоҥсоор буолумуум.
8
Дьэллэм өттүнэн сылдьыым,
Сайда өттүнэн тутуһуум.
9
Ат үрдүгэр буолуум.
Дом!

2А7--14
Чөл буолуу алгыһа

Эдьэн Иэйэхсит,
Бэттэх көрөн
Мичик гын!
Күөгэл-нусхал!
1
Кир хоммотун,
Дьай дьалбарыйдын,
Ыарыы булбатын.
2
Куһаҕаҥҥа умньанымыым,
Киргэ сыстымыым.
3
Дьайга дьалбаарымыым,
Мөкүгэ кииримиим.
4
Чэгиэн буолар
Өттүн тутуһуум,
Чөл буолар
Өттүнэн сылдьыым.
5
Илиим илгэлэннин,
Атаҕым алгыстаннын.
6
Айылҕабын батыһыым,
Айыыларбын саныым.
7
Сайдар диэки салаллыым,
Чэбдик диэки эргиллиим.
8
Айыы өттүн хамсатыым,
Үтүө өттүн үрдэтиим.
9
Үктэммит сирбиттэн
Күөх от үүннүн.