Билбэт тылларгын манна көрөөр: Э.К. Пекарскай тылдьыта

Барҕа алгыстара

1А1--1
Төрүт алгыһа

Аан Айыыһыт,
Бэттэх көрөн
Мичик гын!
Дьаралык!
1
Айыыһытым аартыга
Арылыннын,
Иэйэхситим суола
Тэлэлиннин.
2
Айар көҕүм
Аана арылыннын,
Оҥорор көҕүм
Суола тобулуннун.
3
Айылҕам биэрбитин
Курдук буоллун.
4
Айыыларым эппиттэрин
Курдук буоллун.
5
Оҕо кута
Оонньоотун.
6
Төрүт уотум
Төлкөлөннүн.
7
Аҕа кутум алгыһа
Ала чахчы туоллун.
8
Ийэ кутум эҕэрдэтэ
Илэ чахчы ситтин.
9
Сүүспэр
Сүппэт-оспот
Өркөн түстүн.
Дом!

1А2--2
Имэҥ алгыһа

Имэҥ уонна Дьалыҥ
Айыыһыттар,
Бэттэх көрөн
Мичик гыныҥ!
1
Имэҥ Айыыһытым
Эҥэрдэстин,
Дьалыҥ Айыыһытым
Аргыстастын.
2
Үрүт күүһүм үксээтин,
Алын күүһүм элбээтин.
3
Иһим имэҥнэннин,
Таһым дьалыҥнаннын.
4
Иэним ирдин,
Самыым сылыйдын.
5
Аан дойдум
Айар күүһүн ылан
Чалларыйыым.
6
Орто Дойдум
Өҥүн-талатын ылан
Өҥсүйүүм.
7
Баҕарар ыралаах,
Умсугуйар суоллаах буолуум.
8
Көҕүлүүр күүстэниим,
Угуйар уохтаныым.
9
Киһи киһи буолар
Кэскиллээх суолун батыһыым.
Дом!

1А3--3
Күтүөт эбэтэр кийиит буолар алгыс

Хороҥ Айыым
(Ньэлбэҥ Айыым),
Бэттэх көрөн
Мичик гын!
Дьаралык!
1
Хороҥ Айыым
Холбостун
(Ньэлбэҥ Айыым
Эҥэрдэстин).
2
Күтүөт буолан
Күҥҥэ көстүүм
(Кийиит буолан
Киэҥҥэ тахсыым)
3
Айыылартан
Аҥаарбар хайыһыым,
Айылҕаттан
Аналбын булуум.
4
Олоҕум доҕоро тоҕоостун,
Күндү киһим көһүннүн.
5
Харахпынан хайҕыым,
Сүрэхпинэн сөбүлүүм.
6
Таптыырым таба таарыйдын,
Сөбүлүүрүм түбэһэ түстүн.
7
Үрүт өттүбүнэн
Үтүөтүк өйдүүм.
8
Алын өттүбүнэн
Алыстык ылыныым.
9
Окко түспүт
Оҥоһуум буоллун.
Дом!

1А4--4
Уруу алгыһа

Ахтар Айыыһыт,
Бэттэх көрөн
Мичик гын!
Дьаралык!
1
Саха төрдө буолан
Сандаарыым,
Киһи төрдө буолан
Килбэйиим.
2
Аал уоппун оттуум,
Алаһа дьиэбин тэриниим,
Алтан сэргэбин анньыым.
3
Көмүс ньээкэ уйабын
Иччилиим.
4
Элбэх баайданыым,
Үгүс үптэниим,
Толору тоттонуум.
5
Бэйэ бэйэбитин өйдөһөр буолуум,
Тыл тылбытыгар киирсэр буолуум.
6
Элбэх киһини кытта
Эйэбин холбуум,
Үгүс киһини кытта
Сүбэбин түмүүм.
7
Кир-хох хоммотун,
Дьаҥ-дьаһах булбатын,
Ыарыы-сөтөл ыксаласпатын.
8
Иннибэр ибири билимиим,
Кэннибэр кэбири билимиим.
9
Аҕа ууһа буолан тарҕаныым
(Ийэ ууһа буолан тэнийиим).
Дом!

1А5--5
Оҕо уйатын алгыһа

Хан Айыыһыт,
Бэттэх көрөн
Мичик гын!
Дьаралык!
1
Уол оҕонон уруйданыым,
Кыыс оҕонон айхалланыым.
2
Оҕом уйата
Уруйу кытта оҥоһулуннун.
3
Ыччатым утума
Алгыһы кытта айылыннын.
4
Аньыылаах-харалаах буоллахпына,
Аньыым-харам
Ыччаппар сыстыбатын.
5
Сэттээх-сэлээннээх буоллахпына,
Сэтим-сэлээним
Кэскилбэр киирбэтин.
6
Дьөһөгөйтөн анаммыт
Үрүҥ суругум көһүннүн.
7
Өбүгэлэртэн кэлбит
Үтүө бэлиэм
Үрдээн биэрдин.
8
Айыылартан туттарыым
Улааттын.
9
Иэйэхситим
Эҕэрдэлии турдун.
Дом!

1А6--6
Оҕону иитэр алгыс

Күбэй Айыыһыт,
Бэттэх көрөн
Мичик гын!
Дьаралык!
1
Төрөппүт оҕобун уйалыым,
Атаҕар бигэтик туруоруум.
2
Оҕобор
Урааҥхай саха буолар
Уруйу олохтуум.
3
Кэнчээрибэр
Киһилии буолар
Кэби киллэриим.
4
Ыччаппар
Айыы киһитэ буолар
Алгыһы биэриим.
5
Инникигэ баайан
Иитиим,
Кэскилгэ баайан
Улаатыннарыым.
6
Олох олорорго
Уһуйан таһаарыым.
7
Үлэни сатыырга
Үөрэтэн үүннэриим.
Иннин көрүнэр
Идэни иҥэриим.
8
Бэйэтин баһын
Бэйэтэ билинэр гына
Бэлэмниим.
9
Аҕа баһын
Тосту олордун.
Дом!

1А7--7
Кэскил алгыһа

Эдьэн Айыыһыт,
Бэттэх көрөн
Мичик гын!
Дьаралык!
1
Алтан сэргэм
Аҕыс үйэ тухары
Айгыраабатын,
2
Тойон сэргэм
Тоҕус үйэ тухары
Толугураабатын.
3
Оҕом
Оҕотун оҕотун устун
Уруйум бара турдун.
4
Ыччатым
Ыччатын ыччатын устун
Алгыһым бара турдун.
5
Хааным салҕана турдун,
Удьуорум уһуу турдун.
6
Ийэ кутум
Чэчирээн истин.
7
Өбүгэм үйэлээх
Үгэһэ мөлтөөбөтүн.
8
Инники күлүгүм
Кэтирээн истин.
9
Айыы суола
Мин туспар
Арылла турдун.