6А1--36
Нэм алгыһа

Аан Хаан,
Бэттэх көрөн
Мичик гын!
Алыас!
1
Сүҥ Хаан аартыга
Аһылыннын,
Аан арчы буолун.
2
Тардар тымырбынан
Табы таайыым,
Оонньуур хааммынан
Тобу тойоннуум.
3
Сүрэҕим сөбүлүүрүн
Сүһүөҕэр туруоруум,
Санаам ылынарын
Сайыннарыым.
4
Атын суолга аралдьыйымыым,
Туора суолга буккулумуум.
5
Инним аһаҕас буоллун,
Аартыгым сырдык буоллун.
6
Кырдьыктан туораамыым
Дьинтэн тэйимиим.
7
Турукпун ыһыктымыым
Отуорбун хамсатымыым.
8
Нэммин сүтэримиим,
Кэрээммин кэһимиим.
9
Айыы Суолун
Арыйан иһиим.
Дом!

6А2--37
Айыы ситимин алгыһа

Ситим Хаан,
Бэттэх көрөн
Мичик гын!
Алыас!
1
Күнтэн быаланыым,
Ыйтан ситимнэниим.
2
Амарах санаалаах
Айыы киһитэ буолуум,
Көмүскэс санаалаах
Күн киһитэ буолуум.
3
Тутулукпун уларытымыым,
Туймуубун төлөрүтүмүүм
4
Аан дойдум
Алгыһын ылыым,
Ийэ сирим
Эҕэрдэтин ылыым.
5
Үтүөнү үрдэтэ туруум,
Кэскили кэтирэтэн иһиим.
6
Аналбын толоруум,
Айылҕабын батыһыым,
7
Табылларбын булуум,
Сатанарбын оҥостуум.
8
Сиртэн ситимнэниим,
Халлаантан тутулуктаныым.
9
Үрүҥ Айыы Тойонтон
Өрүһүлтэбин булуум.
Дом!

6А3--38
Тыыны уһатар алгыс

Тыын Хаан,
Бэттэх көрөн
Мичик гын!
Алыас!
1
Айыылартан ситимим
Бигэ буоллун,
Тыыным уһаан истин.
2
Быстах суолга
Быланымыым,
Тутах суолга
Туораамыым.
3
Олус туттумуум,
Аһара дайбаамыым.
4
Кэннэ кэтинчэ да буоллун
Диэмиим,
Иннибин быһа
Этимиим.
5
Сайдар иһин
Сырабын ыытыым
6
Ыра ындыыланыым,
Кэскил кэһиилэниим.
7
Алгыһым үрдэ
Аһаҕас буоллун.
8
Тыыным кылгаабатын,
Кыаҕым кыччаабатын.
9
Быстыбат бырдыланыым,
Сынтарыйбат сындааһыннаныым.
Дом!

6А4--39
Киэҥ көҕүстэнэр алгыс

Киэҥ Хаан,
Бэттэх көрөн
Мичик гын!
Алыас!
1
Тыыным уһаатын,
Көхсүм кэҥээтин.
2
Күннээҕиннэн
Мугурданымыым,
Сарсыҥҥыны
Сабаҕалыым.
3
Кыыһырардааҕар
Киэҥ буолуум,
Өһүргэнэрдээҕэр
Үрдүк буолуум.
4
Киэҥ көрүүлэниим,
Дэлэй санааланыым.
5
Кыраҕа хаайтарымыым
Муннукка симиллимиим.
6
Күн сиригэр талаһыым,
Айыы алааһыгар тахсыым.
7
Олох үөһүгэр олорсуум,
Түбүк үөһүгэр түбэһиим.
8
Барытын сылыктаан
Барҕалыым,
Түөрэтин төрүттээн
Төгүрүтүүм.
9
Кэскиллээх санаа
Киирэ турдун.
Дом!

6А5--40
Хараҕы сырдатар алгыс

Сырдык Хаан,
Бэттэх көрөн
Мичик гын!
Алыас!
1
Көхсүм кэҥээтин,
Хараҕым сырдаатын.
2
Көрөрбүнэн эрэ
Муҥурданымыым,
Билэрбинэн эрэ
Уоскуйумуум.
3
Күлүгү харбаамыым,
Туманы кууһумуум.
4
Хара балыкка хаххалатымыым,
Көлдьүн былыкка күлүктэтимиим.
5
Үктэтиигэ түбэһимиим,
Уһун кутурукка охсуллумуум.
6
Үрүҥү - хараны
Араарыым,
Үтүөнү - мөкүнү
Өйдүүм.
7
Иннибин ыйдыҥардыым,
Кэлэрбин сэрэйиим.
8
Бигэ итэҕэллээх буолуум,
Бөҕө өйдөбүллээх буолуум.
9
Үс-түөрт харахтаах
Үтүө киһи буолуум.
Дом!

6А6--41
Чэпчиир алгыс

Ыраас Хаан,
Бэттэх көрөн
Мичик гын!
Дом!
1
Кир сыстыбатын,
Хох хоммотун.
2
Сүрэҕим этэрин оҥоруум,
Санаам хайгыырын батыһыым
3
Дьон хараҕын кыбыстыбакка
Утары көрүүм.
4
Кэмсинэргэ кииримиим,
Тиһэххэ тэбиллимиим.
4
Сыыһаны хайҕаан
Санаабын ыаратымыым,
Мөкүнү көмүскээн
Өйбүн күлүгүрдүмүүм
5
Санаам чэпчэки буоллун,
Тылым дьэҥкэ буоллун!
6
Ыарахантан көҕүс түһүмүүм,
Кытаанахтан кылгаан биэримиим.
7
Дьэллэм майгыланыым,
Элэккэй быһыыланыым.
9
Үрүҥ күн сырдыгыттан
Үөрэ-көтө сылдьыым.
Дом!

6А7--42
Кырдьык алгыһа