Саха сиригэр саҥа ГЭС тутуллар.

    2007 сыл сэтинньи 6 күнүгэр сарсыарда 10 чаастан Саха сирин Академиятын дьиэтигэр Саха сиригэр Алдан өрүс салаата Тимтоҥҥа Канкунскай уонна Ижорскай диэн ГЭС-тэри тутууга общественнай истии буолар. Онно кэлэргитигэр ыҥырабыт.
    Общественнай истии диэн улахан промышленнай мегапроектарга тутар тэрилтэ эбэтэр проектаннар кэлэннэр олохтоох нэһилиэнньэҕэ истии оҥороннор, көҥүл ылаллар. Онно кыттыбыт дьоннор ханнык усулуобуйаҕа саҥа тутууну көҥүллүүбүт эбэтэр көҥүллээбэппит диэн куоластыыллар.
     Быйыл сайын нефтепровод тутуутугар итинник общественнай истии буолбутугар армяннар фондаларын тойоно, историческай наука доктора Павел Казарян, сахалар Конгресстарын аатыттан лектор Василий Иванов уонна быйылгы Госдума быыбарыгар киллэриллибэтэх «Зеленые» партиялар Саха сиринээҕи салайааччыта Александр Подголов кэлэннэр, Саха сирин общественноһын аатыттан уоттаах-төлөннөөх тыллары этэннэр, кэпсэтиитэ суох көҥүл бэрдэрэ сатаабыттара. Ону общественнай экологтар Анатолий Чомчоев, Зинаида Алтухова, Любовь Егорова уо.д.а. буоланнар бириэмэтигэр туруорсаннар, сөптөөх кэпсэтии, общественнай экспертиза, сууттаһыы оҥотторбуттара. Ол түмүгэр, «Транснефть»-тэн элбэх кэһиини оҥорбут дьоннор сууттаннылар уонна үлэлэриттэн уһулуннулар. Саха сирин президенэ Вячеслав Штыров нефтепровод Лена өрүһү туорууругар хаачыстыбалаах уонна куттала суох буоларын ситиһэр туһунан Москваҕа туруорса сылдьар.
     Бу сырыыга эмиэ общественнай истиигэ тутуу харчытыгар киирсэр дьоннор кэлэннэр, ГЭС тутуллара сөп диэхтэрэ. Кинилэр тимптон, учур, токко уонна алдан эбэҥкилэрэ ханна хаһан олорбуттарын даҕаны билбэт дьоннор. Кинилэри тутуу баран харчы эрэ өлөрөллөрө интэриэһиргэтэр. Онон төрүт олохтоох дьон кэлэҥҥит тылгытын-өскүтүн проектаннарга уонна Саха сирин правительствотыгар тириэрдэргит, куоластыыргыт наадалаах.

Далаана