үс үөһээ бүлүүлэр киирсэ сылдьаллар: Айсен НИКОЛАЕВ, Федот ТУМУСОВ уонна олохтоох баһылык Владимир ПОСКАЧИН. - 23 Апреля 2014

Бары билэргит курдук, бу саас Үөһээ Бүлүү биир мандаттаах уокуругуттан талыллыбыт Ил Түмэн депутата Александр МИРОНОВ орто дойдуттан хомолтолоохтук күрэммитэ. Үөһээ бүлүүлэр онон балаҕан ыйын 14-гэр саҥа депутаты талыахтара. Билиҥҥитэ мандат туһугар улахан киирсии, быһаарсыы, кэпсэтии бара турар. "Бэйэ дьонун" парламеҥҥа киллэрэргэ ааттаах-суоллаах үс үөһээ бүлүүлэр киирсэ сылдьаллар: Айсен НИКОЛАЕВ, Федот ТУМУСОВ уонна олохтоох баһылык Владимир ПОСКАЧИН.

Былаастаах дьоҥҥо ыар ыалдьыт уонна нүһэр хоноһо буолан Бүлүү эбэ кытылын республика таһыгар олорор Василий ФИЛИППОВ буулуо диэн сэрэхэдийии баар. Василий Васильевыһы быыбарга кытыннара сатаабыттара ыраатта. Кини бүтэһигин Юрий ЗАБОЛЕВЫ кытары Дьокуускай мээрин дуоһунаһын былдьаһан көрбүттээх.
Былырыын сайын ФИЛИППОВ аата "ГП" партияны кытары ситимнэнэн ахтылла сылдьыбыта. Ол гынан баран, политика "кырдьаҕас бөрөтө" саарбахтаах соҕус партияҕа аатын ааттатыан туттуммута, онон быыбарга кыттыбатаҕа. Бу сырыыга "ГП"-ттан да буолбатар, атын политическай холбоһуктан ФИЛИППОВ туруон сөп диэн эмиэ саллымар майгы үөскээтэ.
Оттон "бэйэлэрэ бэргэһэлээх" Дьокуускай үөһээ бүлүүлэрэ Константин ТИМОФЕЕВЫ (Сахаагропродукт), бастаан, "техническэй кандидат" быһыытынан талбыттара биллэр. ПОСКАЧИН эмиэ "бэйэтэ киһилээх" диэн этэллэр. Оттон Федот ТУМУСОВ, үгэс курдук, саппыйата ыйааһыннаах кандидаты өйүөҕэ диэн билгэлииллэр.
Онуоха туран, Иван ШАМАЕВ, общественник, дириэктэр, ОП чилиэнэ эмиэ быыбарга кыттабын да сабаас диир тыллаах-өстөөх буолла. Ону үөһээлэр өйүүллэрэ эбитэ дуу, суоҕа дуу. Былырыыҥҥы быыбарга Иван Иванович 202-с түөлбэттэн быыбарга киирсэн иккис бочуоттаах миэстэни ылбыта. Ол айдааннаах быыбар дуораана билигин да суут саалатыгар ньиргийэн олорор. "Адмресурс" оччолорго "Саханефтегазсбыт" генеральнай дириэктэрин Игорь НИКИТИНИ өйөөн Ил Түмэҥҥэ аһардыбыта.
***
Аартык.ру

Үөһээ Бүлүүгэ Василий ФИЛИППОВ кэлэр?