Никита АРЖАКОВ: “Тыгын Дархан” киинэ – саха норуотун өйө-санаата бөҕөргүүрүгэр тирэх буолуоҕа” - 18 Мая 2015

Саха республикатын баһылыга Егор БОРИСОВ ыам ыйын саҥатыгар суруналыыстары кытары көрсүһүүтүгэр, В.Яковлев-Далан “Тыгын Дархан” арамаанынан киинэ уһуллуутугар үлэ бара турарын туһунан этэн аһарбыта.

Ол кэнниттэн “Аартык.ру” саха талааннаах кинорежиссерун Никита АРЖАКОВЫ кытары төлөппүөнүнэн кэпсэтэ сырытта. Онно Никита Иннокентьевич Москваҕа киносценарий суруйуутугар үлэлии-хамсыы сылдьарын, киинэ уһуллуутугар Россия өттүттэн үбүлээһин боппуруоһугар хас да конкурска кыттар былааннааҕын кэпсээбитэ.

Биллэн турар, киинэ хаачыстыбата үптэн быһаччы тутулуктаах, ол мэлдьэҕэ суох. Онон бу кризис кэмигэр үп-харчы боппуруоһа сүрдээх уустук балаһыанньаҕа таҕыста. Ол да буоллар, харчы хаһан да дэлэйбитэ көстүбэт. Онон киинэ хайаан да чуолаан бу быыһык кэмҥэ, саха өссө бүөмнээн, национальнай ураты өйү-санаатын тутан олорор, чөл кэмигэр уһуллара олус наада.

- Егор Афанасьевич, хара маҥнайгыттан киинэ уһулларын өйөөбүтэ, төһө да күннээҕи кыһалҕаны быһаарарга улахан күүс-кыах бараннар даҕаны, бүтүн норуот духуобунаһын боппуруоуһугар, улахан дьалхааннаах кэмҥэ кыра омук тыыннаах хаалар боппуруостарыгар аналлаах проблемаларга болҕомтотун уурара – кини төрөөбүт норуотун туһугар кыһалларын дьэҥкэтик туоһулуур, - диэн кинорежиссер Никита АРЖАКОВ санаатын үллэстэр. - “Тыгын Дархан” киинэ уһулларын кинематографистар, суруйааччылар эрэ буолбакка дьон бары кэтэһэр. Биһиги ыччаппыт өбүгэлэринэн киэн туттуохтарын баҕарабыт. Биһиги норуоппут чулуу дьонноох, киэҥ-дириҥ толкуйдаах, баараҕай ыра санаалаах этэ диэн бу арамаан ис хоһоонун киинэ искусствотын нөҥүө тиэрдэр баҕалаахпыт.

“Аартык.ру”: “Тыгын Дархан” киинэ уһуллара наада дуо?”, - диэн былырыын хас да общественниктартан, политиктартан, араас идэлээх дьонтон, ыччаттан ыйытык оҥорон бэчээттээбитэ. Дьон онуоха: саха киинэтэ сайдан, эпопейнай арамааннары устар таһымҥа тахсыбытын, ыччаты иитиигэ киинэ суолтата дьайыылааҕын, норуот бэйэтин историятынан, чулуу дьонунан киэн туттунуута бу глобализация кэмигэр, күн анныгар бэйэтин миэстэтин буларыгар көмөлөһүөҕэ диэн санаатын эппитэ.

Никита АРЖАКОВ, РФ бочуоттаах кинематографиһа, СР искусствотын үтүөлээх деятелэ, Ойуунускай аатынан Госпремия лауреата, кини уһулбут лиэнтэлэрэ аан дойдутааҕы киинэ фестивалларыгар билиниллэллэр. Онон “Тыгын Дархан” проегы кини ылсыбыта үтүө түмүгү көрдөрүөҕэ диэн эрэнэбит уонна күүтэбит.

***

Аартык.ру