Дьокутаат, дьэ кытаат!

(Үөрэҕириигэ национальнай – региональнай киллэһик көмүскэлигэр)

Кыра омугу эһэр саҥнаах
Сокуон – ыйаах барылын
Ылыммыттар сурахтаах.
Ону олох утарабын!

Билии – көрүү буолар
Сайдыы саамай олуга,
Олох уһун суолугар
Инникибит сырдыга.

Үүнэр эдэр көлүөнэ
Солбуйааччыбыт дэһэбит,
Кини иннигэр үөрэ – көтө
Тугу да кэрэйбэппит.

Биһиги ардыгар умнабыт
Кыра омук буоларбытын,
Сыыһа – халты туттаммыт
Симэлийэн хаалыахпытын.

Сүбэринитиэт сүппүтэ,
Сүбэ – ама бүппүтэ.
Ол дьаһалбыт түмүгэ –
Омук бүттүүн сүтүгэ.

«Улуу» диэбит «убайдарбыт»
Кимэн киирэн иһэллэр.
Баҕар бүөлэннин суолбут,
Кэрэйбэттэр кинилэр.

Ураанхайдарбыт дэһэбит,
Төрүт тылбыт туоһубут.
Ону билэ – билэбит,
Туран биэриэх курдукпут.

Омук буолан бүтэрбитин
Сайдыы суола дэһэллэр.
Саҥабытын мэлитэрбитин
Ордук курдук көрөллөр.

Саха буолар санаабын
Хайдах саба тутабын?
Уратылаах саҥабын
Тоҕо суох гынабын?

Ону туура туттараары
Ыгылыйдым – ыксаатым,
Тылбын – өспүн баар гынаары
Айаҕалана сатаатым.

Сыыһа – халты дьаһаннахха
Инникибит сарбыллар,
«Ээҕи» - кытта сырыттахха
Солбуйааччы сотуллар.

Ханна бааргыт, дьокутааттар,
Талбыт чулуу дьоннорбут,
Туруулаһар хоодуоттарбыт,
Тумус туттар хоһууннарбыт?

«Ньыгыл» да буолбут иннигэр,
Алҕаһы атыллаан аастахха,
Аан алдьархай иинигэр
ТүҺүөххэ сөп, анаарбакка.

Баартыйаны батыһаҥҥыт,
Бэрт буола сатааҥҥыт,
Омуккутун таҥнарымаҥ,
Олохпутун түҥнэримэн!

Эрэлбит эрэ эн, дьокутаат,
ТүҺэн биэримэ, дьэ кытаат.
Сөптөөх суолу тобуларыҥ –
Бар дьоҥҥор кылаат.

Саха буолар саргыбыт
Эн илииҥ иһигэр.
Ыраахтан кэлбэт самнарбыт,
Бу турар дии эн иннигэр.

Атын омук тылынан
Чообурҕаабыт ыччаппыт
Сах – сахалыы санаанан
Салайтаран анаарбат.

Өбүгэтин өйдөөбөт,
Бэйэ омугун билиммэт,
Сирин – уотун, дойдутун
Туруулаһа сатаабат.

Оччотугар омук буолан
Уураанхайдар бүтэбит.
Оһуохайбыт оонньоммот,
Эһиэкэйбит эйээрбэт.

Туймаадабыт үрдүнэн
Сахалыы ырыа дьиэрэйбэт.
Үрүҥ туман бүрүйэн
Өлбөөдүйэн сүтэбиэт?

Дьокутаат, дьэ кытаат,
Бар дьон бары кэтэһэр.
ТүҺэн эрэ биэримэ,
Угаайыга кииримэ!

Дьокутаат, дьэ кытаат!

Омук Уола
Алтынньы 30 күнэ.
Дьокуускай к.