Бу сир талбата (меню)
News topics
Политика.Митинги. Пикеты. Партии [834]
Мысли. Думы.Мнения, обсуждения, реплика, предложения [184]
Суд-закон.МВД.Криминал [1120]
Право, закон [248]
Экономика и СЭР [763]
Власть Правительство Ил Тумэн [1008]
Мэрия, районы, муниципалитеты [353]
Мега пректы, планы , схемы ,программы. ВОСТО [151]
Сельское хозяйство,Продовольствие. Охота и рыбалка [462]
Энергетика, связь, строительство.транспорт, дороги [115]
Коррупция [781]
Банк Деньги Кредиты Ипотека Бизнес и торговля. Предпринимательство [225]
Социалка, пенсия, жилье [245]
ЖКХ, строительство [124]
Образование и наука. Школа. Детсад [196]
Люди. Человек. Народ. Общество [144]
АЛРОСА, Алмаз. Золото. Драгмет. [621]
Алмазы Анабара [161]
http://alanab.ykt.ru//
Земля. Недра [217]
Экология. Природа. Стихия.Огонь.Вода [321]
СМИ, Сайты, Форумы. Газеты ТВ [113]
Промышленность [43]
Нефтегаз [248]
Нац. вопрос [269]
Соцпроф, Совет МО, Общ. организации [64]
Дьикти. О невероятном [165]
Выборы [628]
Айыы үөрэҕэ [15]
Хоһооннор [5]
Ырыа-тойук [16]
Ыһыах, олоҥхо [79]
Култуура, итэҕэл, искусство [329]
История, философия [167]
Тюрки [76]
Саха [115]
литература [32]
здоровье [385]
Юмор, сатира, критика [11]
Реклама [6]
Спорт [120]
В мире [82]
Слухи [25]
Эрнст Березкин [88]
Моё дело [109]
Геннадий Федоров [11]
BingHan [4]
Main » 2014 » Алтынньы » 30 » Уххан "Саха буолбут аакка"
Уххан "Саха буолбут аакка"
08:02
Уххан "Саха буолбут аакка"

Эһиэкэйдиир эһиэкэй
Оһуокайдыыр оһуокай
Айар халлаан аҕалаах
Төрүүр дойду ийэлээх
Арҕаһыттан тэһииннээх
Көхсүлэртэн көнтөстөөх
Күннүүр ууһа буоламмыт


Айыы аймах аатыран
Айыллыбыт аатыгар
Сахтыыр үйэ саҕаттан
Саха омук буоламмыт
Саҥа олох саҕарбыт.Якорь
Оппуохалыыр үйэттэн
Оһуор бичик анньаммыт
Ордон хаалбыт омукпут.
Тимир алтан үйэттэн
Тийэн кэлбит уустарбыт
Мотуок муора кэмнэртэн
Муҥу-сору тыырбыппыт.
Түүрдүүр омук төрүтүн
Түөрэх кээһэн хаалларбыт
Түҥнүүр былыр төрүттээх
Түгэх дьоннор этибит!
Эһиэкэйдиир эһиэкэй
Оһуокайдыыр оһуокай
Муустуур бууһук саҕаттан
Мустар түмсэр биистэрбит
Саамай, саамыл саҕаттан
Сайдан үүнэн турбуппут.
Дойду ууһа аатыран
Дойдулаахха ааҕынан
Дьоһун омук буолбуппут.
Кыргыс үйэ кырыытын
Кылыс батас тохтотон
Саха омук бараххан
Сайдан үүнэн испитэ.
Аҕа атыыр майгыны
Аман өскө анааммат
Айхаллааммыт алҕааммыт
Айан-тутан олоорпут
Ийэ тыһы майгыны
Иилээн салҕаан испиппит.
Айылҕалыын алтыһан
Айыыларга алгыстаан
Иччилэргэ иэҕиллэн
Ыллаан туойан ыһыахтаан
Ыра баҕа санааннан
Ирбэт тоҥноох сирбитин
Иилээн тарҕаан олорон
Сүрэхтэргэ угуттаан
Тымныы кыһын дьыбарын
Тыыммытынан ириэрэн
Кураан чысхаан диэбэккэ
Кукка сүргэ холбооммут
Кууһа тутан олорон
Дойду сирэ оҥостон
Дьоһуннаахтык дьорҕооттоон
Дьоннуур тэҥэ сананан
Олорбуппут оҕолоор!
Эһиэкэйдиир эһиэкэй
Оһуокайдыыр оһуокай
Саха омук өйдөбүлүн
Саламтатын тутаммыт
Дьарык идэ буламмыт
Дьаалалаахтык дьаһаллан
Санаа курдук салаллан
Сайдан үүнэн кэлбиппит.
Эллэй эһэ саҕаттан
Эбии тупсан испиппит
Дойду Ууһа Дьаархантан
Муннььаҥ Дархан муспута
Тыгынныыра Дархантан
Тымыр сыдьаан тардаммыт
Тыыннаах буолар туһугар
Тыыллан тыллан турбуппут!
Аҕа бииһи хомуйан
Олох бииһи ордорон
Хаһаак нуучча батталын
Хааны тоҕо утаран
Хабалаҕа киирбиппит
Хоролордуун хомуллан
Холуонньаҕа симиллэн
Аманаакка ааҕыллан
Арассыйа ыйыстан
Анал дьону ыыталаан
Дьаһал ыйаах быһыллан
Дьаһаах төлүүр этибит.
Түүлээх түһээн түспүтэ
Түрмэ эмиэ буолбута
Эһиэкэйдиир эһиэкэй
Оһуокайдыыр оһуокай
Көҥүл олох бүппүтэ
Көрөр истэр кэлбитэ
Ааты суолу умуннара
Айыылары тумуннара
Алгыс баһын муннара
Атын омук баһыйта.
Саха омук байаана
Самнан саллан хаалбыта
Ыраахтааҕы ыйбыта
Ыйаах дьылҕа дэммитэ
Чугастааҕы чуҥнуура
Чуумпурунан биллэрэ
Хандалылаах кымньыыта
Хамаандата иһиллэрэ.
Эһиэкэйдиир эһиэкэй
Оһуокайдыыр оһуокай
Хойут буолта оҕолоор
Хомуньуустар кэлэннэр
Хомуйталыы тутаннар
Хоммуунаҕа киллэрэн
Холкуос сопхуос олохтоон
Холуонньаны тэрийэн
Иккис тутул иитигэр
Иитэн киирэн баартара.
Сэбиэскэйгэ симиллэн
Симэлийэн испиппит
Сойуустарга соһуллан
Соттук омук буоламмыт
Сойо сүтэ сыспыппыт.
Онтон ордон таххаммыт
Омук аатын ордорон
Олох дьаһах тэринэн
Оннулары булаары
Оҥостунан барбыппыт
Оһуокайдыыр оһуокай
Эһиэкэйдиир эһиэкэй
Улугуруу кэнниттэн
Уһуктаммыт тураммыт
Үһүс көҥүл тутулга
Үлүһүйэн үөрбүппүт
Саҥа саха олоҕун
Саҕалаахтаан испиппит
Сайдар суолу сонордоон
Сарсыҥҥыны отордоон
Саламтаны таламмыт
Санаммыппыт сайдыыга
Анаммыппыт айыыга.
Ырыынакка киирэммит
Ыгылларбыт биллиитэ
Ыраларбыт ынчыга
Иһиллээхтиир буолбута
Саҥа үйэ үүнүүтэ
Саха туһа бүтүүтэ
Мөҥүөн кэмэ мөһүлгэ
Мөккүөрдэрэ кэлбитэ.
Оһуокайдыыр оһуокай
Эһиэкэйдиир эһиэкэй
Көҥөс көҥүл тутулбут
Көстө сүтэ күрэннэ
Саха дэнэр саталбыт
Саламтабыт дьаһалбыт
Салыйаахтаан хааллаҕа
Сирбит баайа сиэттэрэн
Сиэмэх сиирэ баһылаан
Ырыынактыыр майгыннан
Ыстыыр тыырар саҕаттан
Ылар биэрэр туһугар
Ыччат кэлэр кэскилин
Омук эстэр тускулун
Оҥочолоох оҥоһуутун
Отуордарын хамсатан
Отуойкаҕа олордон
Олоотоһон эрэллэр.
Төрдүс төгүл төхтүүргэ
Төлө туппут дьолуоҕа
Үллэһиктээх тэринии
Үлүгэригэр түстүбут.
Баары бары атыылаан
Туоҕу бары ыһыктан
Туокка суоҕу туоһулаан
Тутулуктаах холуонньаҕа
Тутулламмыт киирдибит.
Эһиэкэйдиир эһиэкэй
Оһуокайдыыр оһуокай!
Саха буолбут ааттарга
Күммүт сирин үрдүгэр
Көҥүллэрдээх олохпут
Күрүлүүрдүүр күнүһүн
Күрэнээхтээн хаалбытын
Дьылҕа Хааммыт дьаһала
Одун Хааммыт оҥоһуута
Түөрэх төлкө быһыыта
Түҥнэстигэс майгыта
Түбэстэҕэ диэммит дуу
Уоскутунар буоллахпыт
Улугуран эрдэхпит.
Аанныыр ийэ дойдуга
Атыыр майгы сүттэҕэ
Айар халлаан анныгар
Айыы аймах аҕыйаан
Ахтан кэхтэн эрдэҕэ
Абакката эбитин!
Эһиэкэйдиир эһиэкэй
Оһуокайдыыр оһуокай!
Күннүүр ууһун иһигэр
Күтүрээһин буолбута
Күүстээх эрэ күөмчүлүүр
Көҥүл үйэтэ кэлбитэ
Куһаҕана эбитин.
Сирбит баайын сиэрилэр
Силлибэттик тэринэн
Алмаас көмүс абылаан
Иҥсэлэрин көбүтэн
Сирбит салын ньоҕорун
Тимирдэрин чохторун
Хостонору барытын
Хоро таһар туһугар
Тииһигирэ тииһинэ
Тэринэннэр кэлэннэр
Тимир суолу оҥорон
Тэринээхтээн эрэллэр.
Турба ситим тарданнар
Турунаахтаан иһэллэр.
Ирбэт тоҥу хаһаннар
Илдьиритэ тэпсэннэр
Адыаччыга тийэтин
Алта муора олохтоон
Ууттан уоту ыланнар
Уодуганныах буоллулар
Собуот бөҕө тутаннар
Солбонутуох курдуктар.
Сирбит иэнин хастааннар
Симэһинин оборор
Сүбэлэрин буллулар
Сүлүһүннээх дьайдара
Сүлбэлэргэ сүүрүөҕэ
Сүрэхтэргэ дьайыаҕа
Сүһүөхтэргэ охсуоҕа
Муорга туорга суоллара
Муораларга мустуоҕа
Муҥҥа сорго устуоҕа
Эһиэкэйдиир эһиэкэй
Оһуокайдыыр оһуокай!
Ирбэт тоҥноох дойдубут
Илдьиритэ тэпсиллэн
Хайалардыын хаһыллан
Өрүстэрдиин бобуллан
Өлөн сүтэн турарын
Харахтарбар көрөммүн
Хараастаммын этэбин.
Мөлүйүөннээх омуктар
Көҥүл босхо кэлэннэр
Көрдөрөөхтөөн тураннар
Бэйэлэрин бэртэрин
Соҥнууллара улаатыа
Содурдара соһутуо
Саха тыла сайҕанан
Сатамньыта сарбыллыа
Куппут сүрбүт куудьуллан
Кураанахха уккуллан
Кууран хатан хааларын
Кутуохтара аргыннан.
Улуу омук уулларыа
Урааҥхайы умуннарыа
Кытай омук кыайыаҕа
Кыра омук суураллыа.
Олохтоохуй омуктан
Ордон хаалар биллибэт
Төрүттээхэй омуктан
Төрүүр үөскүүр эбиллибэт
Эһиэкэйдиир эһиэкэй
Оһуокайдыыр оһуокай!
Сахтыыр үйэ саҕаттан
Быста баста быыһанан
Сүтэ сүтэ сөргүллэн
Бүтэ бүтэ бүтэйэн
Чээрэ чээрэ чэлгийэн
Чээлэй күөххэ чэчирээн
Тоҥуу хаарга торолуйан
Уустан биискэ уһуллан
Удьуор хааны утумнаан
Урааҥхайдыыр сахалар
Таҥараттан таптанан
Талан ылан тапталлан
Айыылартан ананан
Иччилэргэ иитиллэн
Истиир дьиҥнээх санаалаах
Ириэнэхтиир омукпут
Өйдөбүлүн өйөөммүт
Өлбөт сүбэ буламмыт
Өрө чөрө буолуоҕуҥ!
Өрө көтөн биэриэҕиҥ!
Эһиэкэйдиир эһиэкэй!
Оһуокайдыыр оһуокай!
Саха туһа санааннан
Салайтаран дьаһанан
Тэбиктээхтик тэринэн
Үөтэлээхтик үөрдүһэн
Үөрэр төрүөт буламмыт
Үөскүүр төрүт буоламмыт
Үөдүйэммит үксүөҕүҥ
Үөрэнэммит көрсүөҕүҥ
Кэлэн иһэр мөһүлгэ
Кэһиилэрдээх кэскилин
Кэтээн кэмин билиэҕиҥ
Кэтэх мэйии этэрин
Кэрэхсээммит истиэҕиҥ.
Саха омук сатыырын
Сайыннаран иһиэҕиҥ
Айар тутар быһыыннан
Атыыр аҕа майгыны
Аналынан аттаран
Албас сүбэ түмэммит
Айыы суолун тутаммыт
Алгыстары көтөҕүҥ!
Этэр тылы эргитэр
Эһиэкэйдиир эһиэкэй!
Ойор тэтим оонньуута
Оһуокайдыыр оһуокай!
Үрүҥ Айыы үөдүппүт
Күннүүр ууһа буоллахпыт
Үрдүк Айыы үөскэппит
Айыы аймах буоллахпыт
Чыҥыс Хаантан ыйаахтаах
Одун хаантан оҥуулаах
Оччолортон баччаҕа
Ордон тийэн кэлбиттээх
Орто дойду дьонобут
Омукпутун ордорон
Олорбуппут даҕаны
Олоробут даҕаны
Олоруохпут даҕаны!
Оһуокайдыыр оһуокай
Эһиэкэйдиир эһиэкэй!
Саха омук сайыннан
Саргылара сандаардын!
Урааҥхайым аймаҕа
Уруйдара улааттын!
Өлөн охтон биэрбэккэ
Өрүһүнэн иһиэҕиҥ!
Өйтөн төйтөн саҕыллан
Өлбөт сүбэ булуоҕуҥ!
Олох дьолун буламмыт
Отуордаһан туруоҕуҥ!
Сатабыллаах сахалар
Саталаахтык саҕыллыҥ!
Оһуокайдыыр оһуокай
Эһиэкэйдиир эһиэкэй!

2007.02.19.
Category: Саха | Views: 852 | Added by: uhhan1
Total comments: 0
Only registered users can add comments.
[ Registration | Login ]
Сонуннар күннэринэн
«  Алтынньы 2014  »
БнОпСэЧпБтСбБс
  12345
6789101112
13141516171819
20212223242526
2728293031
Көрдөө (поиск)
Атын сирдэр
Ааҕыылар

Баар бары (online): 10
Ыалдьыттар (гостей): 10
Кыттааччылар (пользователей): 0
Copyright Uhhan © 2019