Сүрүн сирэй | Бэлиэтэнии | Киирии | Сахалыы бичик (шрифт)Уруй-айхал, Гость ! | RSS
Бу сир талбата (меню)
News topics
Политика.Митинги. Пикеты. Партии [900]
Мысли. Думы.Мнения, обсуждения, реплика, предложения [261]
Суд-закон.МВД.Криминал [1279]
Право, закон [323]
Экономика и СЭР [839]
Власть Правительство Ил Тумэн [1207]
Мэрия, районы, муниципалитеты [398]
Мега пректы, планы , схемы ,программы. ВОСТО [215]
Сельское хозяйство,Продовольствие. Охота и рыбалка [553]
Энергетика, связь, строительство.транспорт, дороги [154]
Коррупция [862]
Банк Деньги Кредиты Ипотека Бизнес и торговля. Предпринимательство [291]
Социалка, пенсия, жилье [276]
ЖКХ, строительство [132]
Образование и наука. Школа. Детсад [215]
Люди. Человек. Народ. Общество [221]
АЛРОСА, Алмаз. Золото. Драгмет. [669]
Алмазы Анабара [161]
http://alanab.ykt.ru//
Земля. Недра [240]
Экология. Природа. Стихия.Огонь.Вода [375]
СМИ, Сайты, Форумы. Газеты ТВ [154]
Промышленность [43]
Нефтегаз [284]
Нац. вопрос [284]
Соцпроф, Совет МО, Общ. организации [65]
Дьикти. О невероятном [183]
Выборы [661]
Айыы үөрэҕэ [92]
Хоһооннор [5]
Ырыа-тойук [22]
Ыһыах, олоҥхо [102]
Култуура, итэҕэл, искусство [365]
История, философия [237]
Тюрки [76]
Саха [152]
литература [41]
здоровье [463]
Юмор, сатира, критика [14]
Реклама [7]
Спорт [121]
В мире [86]
Слухи [25]
Эрнст Березкин [88]
Моё дело [109]
Геннадий Федоров [11]
BingHan [4]
Main » 2015 » Сэтинньи » 3 » Куорат чемпионатыттан санаа
Куорат чемпионатыттан санаа
14:31
Куорат чемпионатыттан санаа

31.10—01.11.15 сыл Газпром «Стерх» спортзалыгар художестеннай гимнастикаҕа Дьокуускай куорат чемпионата ыытылынна. Чемпионаты үөрүүлээхтик арыйыыга уус уран гимнастика федерациятын солбуйааччы бэрэссэдээтэлэ Юрий Николаевич Кравцов киири тыл эттэ. Онтон художественнай гимнастикаҕа икки төгүллээх Олимпийскай чемпионка Ксения Дуткина күрэхтэһии аһыллыбытынан спортсменнары эҕэрдэлээтэ. Чемпионаты: “Алмаас эргиэн баан” спонсордаата. Художественнай гимнастика федерацията күрэхтэһиини хаһааҥҥытааҕар да үрдүк таһымнаахтык ыытта. Урукку сылларга спорт бу көрүҥэр уонча, сүүрбэччэ төрөппүт сылдьар эбит буоллаҕына билигин спортзалга көрөөччүлэр миэстэлэрин толору мустар буолбуттар. Ыалдьааччы ахсаана элбээбит. Төрөппүттэр оҕолорун кытары спорт бу көрүҥэр айымньылаахтык үлэлииллэрэ харахха быраҕыллар. Оҕолорун, сиэннэрин батыһан эһээлэр, эбээлэр ийэлэр, аҕалар дьиэ кэргэнинэн көһөн кэлэллэр. Биллэн туран бу күрэхтэһии күүрээнин эрэ буолбакка спорт бу көрүҥэ маассаҕа улаханнык кэрэхсэнэн эрэрин туоһута.

Быйылгы күрэхтэһиигэ кыттыбыт кыргыттар хаһааҥҥы да сыллааҕар күрэхтэһэр таһымнара үрдээбит. Бу син биир ырыынаакка уонна спортка хаһан да буоларын курдук доруобай конкуренция баарын үтүө түмүгэ. Дьокуускайдааҕы “Бриллианты Туймаады” СК кыргыттара ааспыт сыллардааҕар баһаамын эбиллибиттэр. Тренердэр урукку сылларга холуйдахха балачча ситиһиилээхтик үлэлээбиттэр.

Виолетта Иванова “Виолетта” спортивнай кулуубун кыргыттарыгар олох атын санааны этиэххэ сөп. Биһиги хаһан эрэ спорт бу көрүҥэр саха уус-уран гимнастикатын аан дойду үрдүкү таһымыгар таһаарар кыахтаах кыһыл көмүс ыллыгы билэр бэйэбит кыыспыт Виолетта Иванова кэлэн үлэлээн эрэр, диэн үөрбүппүт-көппүппүт. Бүгүн бу саалаҕа олорон ол санаабыт чахчы туолар кыахтааҕын итэҕэйэр кыахха киирбиппит. Виолеттаны көҕүлээн Россия Олимпийскай эрэллэр кылаабынай тренердэрэ Надежда Шаталина хаста да кэлэ сылдьан анаан-минээн алгыс тылын этэн Виолеттаҕа улаханнык эрэнэрин биллэрбитин өйдүүбүт. Тоҕо эрэ бүгүн Россия улахан тренерэ эппит ол кынаттаах алгыс тыллара, кырачаан кыргыттар бүгүҥҥү үҥкүүлэриттэн мин төбөбөр көтөн түстэ.

Виолетта Иванова кулуубугар кини бииргэ үөрэммит подругата икки төгүллээх Олимпийскай чемпионка Ксения Дуткина кэлэн үлэлиир. Кинилэр хайы-үйэ спорт бу көрүҥэ олох саҥа үрдүк таһымҥа тахсар кэскиллээҕин төрөппүттэргэ да, ыалдьааччыга да итэҕэппиттэр. “Виолетта” СК-ан кыттар кыргыттар бэрт имигэстик, музыка алыптаах дорҕоонноругар сөп түбэһиннэрэн, буолан баран олус элбэх уустук хамсаныылары холбоон үҥкүүлүүллэр. Били аһара уустук хамсаныылары оҥорорго аатырар эластика, пластика диэннэрин дьэ манна булан көрүөҥ. Саха кэрэчээнэ Туйаарыма куоларын иитэр кыһа манна чахчы баар буолбутун көрбүт эрэ кэрэхсииһи.

Кыралара бэрт ол эрээри элбэх улахан талааннах кыргыттар бу кулуупка көстөллөр. Ол эрээри бакаа саха сиэринэн кырачаан куоларбыт ааттарын ааттыыры туттунан эриэххэ. Дьарыктаннынар, үөрэннинэр улаатан истэхтэрин аайы кинилэргэ ыалдьарбыт кинилэри кытары тэҥҥэ харах уута
тохтуулаах хомолто, өрөгөйдүүр үөрэр-көтөр күннэрбит, араастаан ууга-уокка түһэрбит өссө да иннибитигэр турдаҕа.

Күрэхтэһиини үөрүүлээхтик сабыыга туналыйар Туймаада эбэ хочо Дьокуускай куоратын кырачаан кыайыылаахтарыгар ”Алмаас эргиэн” баан сыаналаах бириистэри, өйдөбүнньүк бэлэхтэри туттартаата. Дьокуускай куорат уокуруктарын наҕараадаларын туттарыыга тоҕо эрэ “Виолетта” СК оҕолоро, тренердэрэ тиксибэтэхтэрэ төрөппүттэргэ өйдөммөт түгэни үөскэттэ. Аҥаардастыы “Бриллианты Туймаады” СК тренердэрин уонна онно үөрэнэр оҕолору наҕараадалаатылар. Тренер Татьяна Шишигина кэлтэй биэс, алта араас наҕарааданы ылла. Оттон спорт үтүөлээх маастара икки төгүллээх Олимпийскай чемпионка, европа, аан дойду элбэх төгүллээх чемпионката, “Доҕордоһуу” уордьан кавалера Ксения Дуткинаҕа тэрийэр кэмитиэт аатыттан суруктаах саатар биир лиис кумааҕы өйдөбүнньүк бэлиэ буолан тиксибэтэҕин төрөппүттэр сөрү-сөпкө сүөлүргээтилэр.
Кыайыыны баһыйар үксүн ол да гыннар “Виолетта” СК кэрэчээнэ куолара ылан үөрдүлэр көттүлэр.
 
Спорт саалаттан санаа

Виолетта Иванова уус уран гимнастикаҕа аан дойдуга аатырбыт тренер Ирина Винер Россия Олимпийскай эрэллэр оскуолаларын Москва куоракка бүтэрбит, психолог педагок идэлээх специалист. Киниэхэ бу оскуолаҕа бииргэ үөрэммит подругата спорт үтүөлээх маастара икки төгүллээх Олимпийскай чемпионка, Россия историятыгар саамай эдэр Олимпийскай чемпионка, Доҕордоһуу уордьан кавалера, европа уонна аан дойду элбэх төгүллээх чемпионката Ксения Дуткина Москваттан тренер быһыытынан “Виолетта” СК-ҕа үлэлии кэлбитэ улахан үөрүүлээх дьоһун сонун.

Маны тоҕо тоһоҕолоон бэлиэтээтим. Спорт эйгэтигэр ханнык баҕарар идэҕэ курдук киэҥ улахан уорҕайдарга биллэр улахан авторитет буолуу үрдүкү ситиһиини ыларга саамай улахан төһүү күүс. Сахалар оннооҕор бара сатаан онно-манна баран үҥкүүлээн, ыллаан кэлэ-кэлэ “аан дойдуга аатырдыбыт”,-- диэн киэн туттарбытын сүрдээҕин сөбүлүүбүт. Дьиҥэр биһиги сахалыы үҥкүүбүт, ырыабыт, диэхтээн индеецтэр уоту тула үҥкүүлээбиттэр, диэбит курдук улуу судаарыстыбаларга көннөрү экзотика эрэ буоллаҕа. Билиҥҥи сайдыылаах аан дойду таһымыгар эппиэттэһэр ханнык да улахан классическай айымньы буолбатах.

Оттон уус уран гимнастика дьэ бу чахчы кыыс оҕону Олимпийскай спортивнай үрдэлгэ таһаарар спорт көрүҥэ. Сахалар көҥүл тустууга үс медалист уонна уонунан Олимпиецтаахпыт, диэн дьэ чахчы саамай сөпкө киэн туттуохпутун туттабыт. Маны ситиһэр туһугар саха норуота ааспыт үйэ ортолоруттан араас өрүттээх балачча баай историялаах элбэх үлэни үлэлээтэ.

Мантан сиэттэрэн ааспыты санаатым. Виолетта Иванова бастаан Москваҕа үөрэнэ барарыгар улахан өйөбүлү оҥорбут ОАО ”Анаабыр Алмаастара” генеральнай директора М.Н.Евсеев оҥорбут үтүө өҥөтүн өйдөөн кэллим. Матвей Николаевич чахчы да ырааҕы кэскиллээҕи өтө көрөн Виолетта Иванованы үбүнэн-харчынан өйөөн Россия Олимпийскай эрэллэрин оскуолатыгар үөрэттэрбит эбит. М.Н.Евсеев оҥорбут бу үтүөкэн дьыалата
биһиги төрөөбүт түөлбэбитигэр күн бүгүн бэйэтин өлгөм үүнүүлээх араскытын быктартаан эрэр.

Итинтэн сэдиптээн Саха республикатын спордун министрэ биир көлүөнэҕэ үөскээбит үөлээннээхпэр бу быкпыт араскылары бүөбэйдиир аналлаах М.Д.Гуляевка анаан сааһыран да эрэрбитинэн аҕыйах тылы этиэхпин баҕардым. Аҕыйах сыллааҕыта эн биһикки, эн кэбиниэккэр уус уран гимнастика киэҥ эйгэҕэ тахсарын туһугар аҥаардас үчүгэйи кэрэни ыралаан бэрткэ да кэпсэппиппит. Эн уус уран гимнастикаҕа бастакы көмөлөрү оҥорбуккун өйдүүбүн. Ол кэмтэн ыла хас да хаар уулунна.

Бүгүн эйиигиттэн өссө төгүл көрдөһүөм этэ Дьокуускайга “Виолетта” СК-гар арааһа илэ бэйэҕинэн киирэ сылдьаргар сөп буолбут. Өссө күрэхтэһиигэ сылдьан кырачаан кыргыттар үҥкүүлүүллэрин көрөрүҥ буоллар олох атын өйгө-санааҕа кэлиэҥ уонна мин оччолорго эппит этиим чахчы олохтооҕун өйдүөҥ этэ. Эн бу уус уран гимнастикаҕа анаан-минээн программа оҥостон үлэлэстэххинэ спорду тэрийэр үлэҕэ үлэлээбитиҥ устата спортка саамай улахан ситиһиигин бу уус уран гимнастика эйиэхэ биэрииһи. Уус уран гимнастиканы дьарык оҥостон анаан-минээн үлэлэһэн, үчүгэй ирдэбилгэ эппиэттиир спортзал биэрэн, суох элбэх спортзаалы эбии туттаран да туран дьарыктанарыҥ буоллар аны уус уран гимнастика алта сэттэ сылынан Олимпийскай чыпчаалга тахсарыгар кыһыл көмүс муостаны уурар кыахтаммыккын бүгүҥҥү чемпионаты көрө олорон өссө төгүл бүтэһиктээхтик итэҕэйдим.

Оччоҕо урут саха киһитэ күүстээх, бөҕө дьонунан аан дойдуга аан бастаан аатырбыт эбит буоллаҕына аны аан дойду таһымыгар дьэ дьиҥнээхтик сахалар саамай кэрэ кыргыттарынан, далбар хотун дьахталларынан аатырарыгар кыаҕы биэрэр балаһыанньаҥ күн бүгүн үөскээбит. Баатыҥ, дьолуҥ-соргуҥ тардар буолбут. Эппитим курдук онно бастакы кыһыл көмүс укулааты уурбут үтүөлээх киһинэн М.Н.Евсеев буолар.

ССРС кэминээҕи уус уран гимнастикаҕа холуйдахха билиҥҥи кэм уус уран гимнастиката олох атын ирдэбиллээх, быдан үрдүк таһымнаах эйгэҕэ тахсан турар. Оҕолору эрчийии, бэлэмнээһин методиката, этиката эмиэ онно сөп түбэһиннэрэн уларыйан, саҥардыллан олох атын таһымҥа тахсыбыт. Уус уран гимнастика аан дойду эйгэтигэр күн-түүн сайда саҥардылла, үүнэ-сайда турар спорт эдэр көрүҥэ. Онно аан дойду таһымыгар саамай элбэх уонна улахан уларыйыылары оҥорууга тренер Ирина Винер Россия уус уран гимнастикаҕа Олимпиецтары бэлэмниир оскуолата биэрэр.

Бу оскуола кэлиҥҥи хас эмэ Олимпийскай циклга иннин аан дойду ханнык судаарыстыбатыгар биэрэ илик. Билигин “Виолетта” СК-ны Ирина Винер Россия уус уран гимнастикаҕа Олимпийскай эрэллэрин оскуолатын филиалын курдук көрүөххэ эмиэ сөп. Итинник саныырга төрүөттэр бааллар. “Виолетта” СК тренердэрэ Виолетта Иванова уонна икки төгүллээх Олимпийскай чемпионка Ксения Дуткина Москва куоракка бу оскуоланы бүтэрбиттэрэ. Олимпийскай чемпионнары иитэр оскуола хас биирдии оҕотуттан саҕалаан улахан тренердэригэр тиийэ олус чугастык биир дьиэ кэргэн оҕолорун курдук итии-сылаас сыһыаннаахтар. Ксения Дуткина уонна Виолетта Иванова үөрэтэр оҕолорун эрчийэр программаларын бу Россия Олимпийскай эрэллэр оскуолатын тренердэринээн сүбэлэһэн оҥороллор.

Ксения Дуткина Россия уус уран гимнастикаҕа Олимпийскай эрэллэр оскуолатыгар саамай эдэр Олимпийскай чемпион буолбут биир бастыҥ иитиллээччи. Биһиэхэ сахаларга маннык үчүгэй балаһыанньа хата бэйэбит оҕолоох буоламмыт буор босхо бэйэтинэн кэлэн биэрбитин туһанан өссө үрдүкү сайдыыга үтүөҕэ-кэрэҕэ тахсар күммүт кэлбит. Кэлбит өссө төгүл кэлбит,-- диибин ытыктабыллаах Михаил Дмитриевич эн биһиги сиэннэрбитин кэнэҕэски саха кэрэчээнэ кыргыттарын, далбар хотун дьахталларын талаанын аан дойду таһымыгар арыйан көрдөрүүгэ үлэлэһэр эр киһи да, эһэ да, аҕа да быһыытынан тэрийсэр ытык эбээһинэспит буоллаҕа.
“Виолетта” СК кэҥиир

Эдэр сааһыттан спорт төлөннөөх пропогандиһа Олег Иннокентьевич Иванов үүнэр көлүөнэҕэ спорду тэрийиигэ сааһын тухары сыламтата суох айымньылаахтык үлэлиир. Кини Покровскай куоракка уус уран гимнастиканы тэрийиигэ Виолетта Иванованы кытары үлэтин саҕалаан “Виолетта” СК филиалын арыйан үлэлээбитэ хаһыс да сыла. Кини тренердэр Анна Афанасьевна Матус уонна Алина Андреевна Назарова үлэлэрин кииннээн тэрийиигэ бэйэтин баай уоппутунан ахсаабакка көмөлөһөр. Бу үлэлэрэ Дьокуускай куорат бу күрэхтэһиитигэр биэс оҕону кытыннарбыттарыттан түөрдэ миэстэлэһэн үлэлэрин сөптөөх хайысханан ыытан иһэллэрин билэн үөрэн-көтөн дойдулаатылар.

Маны таһынан Дьокуускай куоракка “Палладиум” атыы эргиэн дьиэтигэр иккис спортзалларын арендалаһан бу күннэргэ балтараа сүүсчэкэ оҕону эбии сүүмэрдээн кэккэлэрин өссө хаҥатыннылар. Виолетта Иванова бэйэтин иитиллээччилэриттэн эбии тренерскэй састаабы сүүмэрдээтэ. Саҥа хариографтар артыыстааһын маастарыстыбатыгар үлэһиттэр кэллилэр.

Бу күннэргэ тренер Ирина Винер ыҥырыытынан “Виолетта” СК биир бастыҥ иитиллээччитэ биһигини элбэхтэ бэйэтин ситиһиитинэн үөрдүбүт-көтүппүт Туйаара Кардашевская Москваҕа Россия Олимпийскай эрэллэр оскуолаларыгар үөрэнэ барар буолла. Бу саха уус уран гимнастикатыгар хайы-үйэ үрдүкү ситиһиигэ бастакы улахан хардыы. Туйаара Кардашевская инники ситиһиилэригэр төрөөбүт сахатын сирин, үөрэммит “Виолетта” СК-ын аата ааттана туруо. Виолетта СК бастыҥ иитиллээччитэ, олоҥхо дойдутун дьиҥнээх Туйаарыма куота-Туйаара Кардашевскаяҕа айымньылаах элбиих-элбэх үлэни. Россия уонна аан дойду таһымыгар үрдүкү спортивнай ситиһиилэри уус уран гимнастикаҕа сүгүрүйэр ааҕааччы доҕоруом баҕарыах.

Арамаан Дьөгүөрэп.
 
Category: Спорт | Views: 1408 | Added by: uhhan1
Total comments: 0
Only registered users can add comments.
[ Registration | Login ]
Сонуннар күннэринэн
«  Сэтинньи 2015  »
БнОпСэЧпБтСбБс
      1
2345678
9101112131415
16171819202122
23242526272829
30
Көрдөө (поиск)
Атын сирдэр
Ааҕыылар
Баар бары (online): 3
Ыалдьыттар (гостей): 3
Кыттааччылар (пользователей): 0
Copyright Uhhan © 2024