Санкт-Петербурга IV норуоттар икки ардыларынааҕы Култуура форумугар Сергей Зверев-Кыыл Уолун сүдү талааныгар сүгүрүйэн - 17 Декабря 2015

Санкт-Петербурга IV норуоттар икки ардыларынааҕы Култуура форумугар Сергей Зверев-Кыыл Уолун сүдү талааныгар сүгүрүйэн	19:27
Санкт-Петербурга IV норуоттар икки ардыларынааҕы Култуура форумугар Сергей Зверев-Кыыл Уолун сүдү талааныгар сүгүрүйэн Ахсынньы 15 күнүгэр А.И.Герцен аатынан Россия судаарыстыбаннай педагогическай университетыгар "Аан дойду норуоттарын култууратыгар омук уратытын харыстааһыҥҥа норуот ырыаһытын оруола" диэн ааттаах норуоттар икки ардыларынааҕы научнай-практическай конференция буолан ааста. Бу тэрээһин норуот ырыаһыта, ССРС Суруйааччыларын сойууһун чилиэнэ Сергей Зверев-Кыыл Уола төрөөбүтэ 115 сылыгар ананна . Конференцияҕа Саха сириттэн Ил Түмэн бэрэссэдээтэлэ Александр Жирков, Ил Түмэн бэрэссэдээтэлин бастакы солбуйааччы Анатолий Добрянцев, Ил Түмэн депутаттара Василий Власов, Владимир Членов, СӨ култууратын уонна духуобунай сайдыытын миниистирэ Владимир Тихонов, Санкт-Петербург куоракка СӨ боломуочуйалаах бэрэстэбиитэлин солбуйааччы Станислав Константинов, А.И. Герцен аатынан университет ректора Валерий Соломин кытыннылар. Александр Жирков конференция кыттыылаахтарын эҕэрдэлииригэр Кытай киин куоратыгар -- Пекиҥҥэ "Олоҥхо дойдутун искусствота" диэн ааттаах Саха сирин култууратын күннэрэ ыытыллыбыттарын, Россия артыыстара "Кинээс Игорь" операны көрдөрбүттэрин, оттон Кытай артыыстара саха олоҥхотугар тирэҕирбит "Туналҕаннаах ньуурдаах Туйаарыма Куону" туруорбуттарын туһунан эттэ. "Бу маннык уһулуччулаах айымньыларынан атастаһыы туһунан ЮНЕСКО генеральнай дириэктэригэр Ирина Боковаҕа кэпсээтим. Онуоха кини култуура уонна искусство көмөтүнэн омуктар чугасыһыыларыгар хааччах суоҕун, ЮНЕСКО бу сүрүн соругу ситиһэргэ болҕомтону уурарын эппитэ. Ити этиллибиккэ Сергей Зверев айар үлэтэ толору эппиэттэһэр", - диэн парламент спикерэ бэлиэтээтэ. Александр Жирков Сергей Зверев саха култууратыгар эрэ буолбакка, атын норуоттар култуураларыгар сүдү кылааты киллэрбитин туһунан аҕынна: "Хас биирдии омук култуурата, киһитин ахсааныттан тутулуга суох, баай ис хоһоонноох, ол онтон биир эмэ өрүтэ сүттэҕинэ эбэтэр умнулуннаҕына, кэнники өттүгэр содуллаах буолар. Бу баайы-дуолу өйдөрүгэр, дууһаларыгар, сүрэхтэригэр илдьэ сылдьар, ону харайар, саҥа көлүөнэҕэ тиэрдэр дьонноох буоллаҕына – бу хас биирдии омук туохха да тэҥнэммэт күүһэ буолар. Сергей Афанасьевич Зверев – саха култууратын эрэ буолбакка, аан дойду норуоттарын култуураларын киэн туттуута." “Сергей Афанасьевич Зверев саха култууратын тутан, иҥэринэн сылдьааччы эрэ буолбакка, көхтөөх тарҕатааччы быһыытынан биллэрэ. Олоҕун тиһэх күннэригэр диэри ылбыт билиитин, өйүн-санаатын кэнчээри ыччакка, кэлэр көлүөнэҕэ, кинини утумнааччыларга тиэрдибитэ. Кинини саха национальнай култууратын, искусствотын уонна нэһилиэстибэтин тарҕатааччы, илдьэ сылдьааччы быһыытынан сыаналыыбыт. Кини -- ураты, сэдэх киһи", - диэн Ил Түмэн бэрэссэдээтэлэ бэлиэтээтэ. Маны сэргэ спикер Сергей Зверев талаанын туһунан ахтан ааста: "Сергей Афанасьевич Зверев саха култууратын үгүс хайысхатын: үҥкүүнү, литератураны, уус-уран уонна композиционнай салаалары – төрүттээччи быһыытынан биллэр. Кини үҥкүүлэрин элбэх көлүөнэ толорор. Маннык нэһилиэстибэни улуу эрэ киһи хаалларар кыахтаах". Түмүгэр Александр Жирков аан дойдутааҕы научнай практическай конференция бары кыттыылаахтарыгар саҥа айар дабайыылары уонна ситиһиилэри баҕарда. Конференция кыттыылаахтара "Норуот ырыаһыта С.А. Зверев-Кыыл Уола уонна аныгы олох", "Сергей Зверев, Устин Нохсоороп, Иоаким Избеков уонна билиҥҥи саха олоҥхоһуттара бииргэ үлэлэһиилэрин холобурдарыгар фольклору толорооччулар уйулҕаларын туруга", "С.А. Зверев айар үлэтэ ойууннар үгэстэрин кытта биир ситимнээх кэрчиккэ туруута", "Саха сирин искусствота үөскээн тахсыытыгар С.А. Зверев-Кыыл Уолун өҥөтө, кылаата", "С.А. Зверев-Кыыл Уола айар үлэтин нэһилиэстибэтэ: уопут, проблемелар, көрдөөһүннэжр" диэн тиэмэлэргэ дакылааттары аахтылар. Ил Түмэн пресс-сулууспата
Category: Култуура, итэҕэл, искусство \| Views: 1385 \| Added by: uhhan1