Гурий Турантаев-Бороҕон оҕонньор туһунан кинигэ сүрэхтэниитэ - 24 Февраля 2016

2016 сыл олунньу 21 күнүгэр, Танда үрэх аллараа тардыытыгар сытар, республикага элбэх норуот эмчиттэринэн, маастардарынан киэҥник биллэр, кырдьаҕас Бээрийэ бөһүөлэгэр дьоро кун тосхойдо. Ол курдук бутун Арассыыйэ эбэҕэ норуот эмчитинэн киэҥник биллибит Гурий Турантаев-Бороҕон Оҕонньор туһунан Егор Картузов суруйбут кинигэтин сурэхтэниитэ буолла.

Күнүс эбиэт саҕана олохтоох культуура киинин дьиэтигэр ыҥырыылаах ыалдьыттар, Гурий Ивановичка эмтэнэн олохторун иккистээн саҕалаабыт махталлаах дьонноро, Оҕонньор табаарыстара, бииргэ үөскээбит, улааппыт үөлээннээхтэрэ кэлитэлээн бардылар.

Ыраахтан кэлбит ыалдьыттары Гурий Иванович дьиэ кэргэнэ уонна олохтоох «Арчы» культуура киинин улэһиттэрэ үөрэ-көтө керустулэр, сылаас тотоойу аһынан уонна итии чэйинэн утах тутан ыалдьыттарын уһун айантан сылайбыттарын таһааран үөрүүлэрин үксэттилэр. Кулууп дьиэ фойетыгар олохтоох нэһилиэк библиотеката уонна музейа бэлэмнээбит Гурий Турантаев бэйэтин уонна дьиэ кэргэнин туһунан бэртээхэй быыстабка үлэлээтэ, сүрэхтэниигэ кэлбит ыалдьыттар кинигэ дьоруойун олоҕун, үлэтин туһунан дьоһуннук билистилэр. Кунус 2 чаастан кинигэ сүрэхтэниитин үөруулээхтик аһыы саҕаланна, үөрүүлээх тэрээһини «Хотугу сулус» телеакадемия дириэктэрэ Татьяна Афанасьевна Гоголева ыытта.

Сүдү киһини кинигэ сурэхтэниитинэн зҕэрдэлии кэлбиттэр: улуус баһылыга А.В.Федотов, Чурапчы улууһун администрацията, Түүлээх, Тиит Арыы уонна Байаҕантай нэһилиэктэрин баһылыктара, Республика уонна улуус ойуурун хаһаайыстыбатын салайааччылара В.Е.Попов, Ю.Т.Крылыков, Саха сирин суруйааччыларын сойууһун салайааччыта Н.И.Харлампьева , «Бичик» кинигэ издательствотын салайааччылара Август Егоров уонна Валерий Луковцев, поэт Анатолий Старостин-Сиэн кынат, Россия Героя Михаил Готовцев, Ил Тумэн IV ыҥырыылаах мунньаҕын депутата, Гурий Ивановиһы кытта баай байанай бэлэҕин бииргэ бултаспыт үөлээннээҕэ Н.Н.Костромин, араас кэмҥэ Гурий Ивановичка эмтэммиттэр, огонньор бииргэ үөскээбит, үлэлээбит, алтыспыт үөлээннээхтэрэ.

«Арчы» сынньалан киинэ сылаас саалатыгар толору мустубут дьон иннигэр үөһээ сценага кинигэ сүрүн геройа Гурий Турантаев хааман тахсан сымнаҕас дьыбааҥҥа олорунан кэбиһэр, кинини кытта кинигэ автора Егор Картузов уонна оҕонньор ортоку уола, экономическай наука кандидата Степан Турантаев тахсаллар. Кинигэ автора Егор Картузов кинигэ хайдах суруллубутун, туох ыарахаттары көрсүбүтүн сиһилии кэпсээтэ, оннооҕор кинигэ суруйа сылдьан оҕонньор дьону хайдах эмтиирин көрөөрү бэйэтэ да билбэккэ дьон ыарыытын диагноһын туруорар буолан хаалбытын уонна да атын элбэх түгэни олус кэрэхсэбиллээхтик кэпсээтэ.

Үөрүүлээх тэрээһиҥҥэ олохтоох «Арчы» культуура киинин үлэһиттэрэ, олохтоох самодеятельность талааннаах үҥкүүһүттэрэ, ырыаһыттара, ону таһынан Саха Республикатын культуратын үтүөлээх үлэһитэ, саха норуотун биир кэрэ куоластаах ырыаһыта Анатолий Бурнашев, биир дойдулаахтарбыт, опера уонна балет театрын эдэр талааннаах ырыаһыттара Зинаида Колодезникова, Дина Охлопкова кыттан олус киэргэттилэр. Оҕонньору кинигэ сүрэхтэниитинэн эҕэрдэлии кэлбит ыалдьыттар тыл этэр бириэмэлэригэр саалаҕа олорор дьону сылаас саламаатынан, итии чэйинэн, кымыстаах утаҕынан уонна да атын минньигэс аһынан күндүлээтилэр.

Гурий Иванович Турантаев туһунан кинигэ сүрэхтэниитин бэлиэтиир үөрүүлээх тэрээһин наһаа истиҥник ыытылынна, ыалдьыттар бары сүргэлэрэ ккөтөҕүллэн, үөрзн-көтөн тарҕастылар.

***
Аркадий Охлопков,
Бээрийэ бөһ., Уус Алдан.