От ыйын 20 күнүгэр “Норуот күүһэ” (Народная воля) уопсастыбаннай хамсааһын лиидэрэ Эрэл Васильев Ил Түмэн дьокутаатыгар хандьыдаат дастабырыанньатын тутта.
Эрэл Васильев “Заложнай” быыбардыыр уокурукка “Гражданскай платформа” баартыйаттан киирсиэҕэ. Хандьыдаат дастабырыанньатын тутан баран эдэр киһи быыбардыыр хамыыһыйаҕа, бэйэтин өйүүр дьонугар маннык диэтэ:
– Өрөспүүбүлүкэ судаарыстыбаннай мунньаҕар “Биир ньыгыл Арассыыйа” эрэ баартыйа салайан олоруо суохтаах. Кинини кытта тэҥҥэ күрэстэһэр, норуот санаатын тиэрдэр, дьон интэриэһин туруулаһар атын баартыйалар эмиэ баар буолуохтаахтар. Ол иһин мин “Гражданскай платформа” баартыйаттан дьонум-сэргэм санаатын былааска аһаҕастык тиэрдээри, баар кыһалҕалары дьиҥ-чахчы быһаарсаары туруоруннум.
Мин мэлдьи туруорсар туруорсууларбын тиһэҕэр тиэрдэр санаалаахпын. Ол курдук, күн бүгүн экэнэмиичэскэй кыһалҕалар аһара сытыытык турдулар. ДьУоХХ тарыыптара аһара үрдүктэр, үрдүү да турар чинчилээхтэр. Ону, дьиҥэр, тохтотуохха уонна түһэриэххэ сөп. Мин ити кыһалҕаҕа күүскэ ылсар, дьаныардаахтык үлэлиир уонна туруорсар санаалаахпын. Аны биэнсийэ саҥа реформатын эмиэ күүскэ утарабын. Судаарыстыба дьон биэнсийэҕэ тахсар сааһын үрдэтэрэ сиэрэ суох. Социальнай хайысхалаах судаарыстыба итинник буолара олох сатаммат. Барыта дьон туһугар буолуохтаах. Киһи биэнсийэбэр диэн үйэтин-сааһын тухары муспут харчытын бэйэтэ хаһан баҕарар устар, бэйэтин баҕатынан туттар бырааптаах эбэтэр ыччаттарыгар аныыр кыахтаах буолуохтаах. Өссө киһи сонньуйара диэн билигин Алроса, Сургутнефтегаз, Роснефть курдук Саха сиригэр үлэлиир бөдөҥ хампаанньаларга чэпчэтиилээх нолуогу туруорсаллар. Бу норуоту араас нолуоктарынан, сыана үрдээһининэн үүйэ-хаайа турар кэмнэригэр, олус кэрээнэ суох быһыы. Дьиҥэр, итинник буолуо суохтаах. Ол туһугар мин эмиэ күүскэ үлэлиир, туруорсар уонна ирдэһэр бигэ санаалаахпын.
