ЫТЫКТАБЫЛЛААХ ВАРВАРА АФАНАСЬЕВНА уонна АЛЕКСАНДР НИКОЛАЕВИЧ!

Чурапчы чараҥа, Сылаҥ- Түөйэ сирэ уонна Бүлүү Эбэ кэрэ-мааны салаата Чуона өрүс, дьоһун Туой Хайа уруу-хаан буолбуттара 50 сыл буолла. Бу үйэ аҥаардаах уһун кэмҥэ Варвара Афанасьевна уонна Александр Николаевич дьиэ-уот тэринэн, төрөтөр оҕону төлкөлөөн, сиэннэнэр дьолу билэн, үгүс моһоллору эрдээхтик туораан дьоһун олоҕу олорон кэллигит.

Эһиги олоххут Саха сирин историятыгар киирэр, сотуллубат бэлиэ түгэннэрдээх дьикти ыраас, үгүстэргэ үтүө холобур буолар айыы олоҕо. Бэйэ-бэйэҕитин өйөһөн, харыстаһан, өйгүтүн-санааҕытын холбоон бу уһун сыллары туораатыгыт. Туораатыгыт эрэ буолбатах – сыралаах үлэҕит, үрдүк ситиһиигит төрөөбүт Сахаҕыт сирин киэн туттуутунан буоларын хас саха барыта билэр, итинэн киэн туттар. Модун Сэбиэскэй Сойуус, Европа, Аан дойду, Олимпийскай оонньуулар түһүлгэлэрэ итини эмиэ бэркэ билэллэр, умнубаттар. Тулаайахсыйбыт Туой Хайа эмиэ...

Итилэри санатан тураммыт Бүлүү өрүһү көмүскүүр аналлаах “Бүлүү” общественнай-экологическай кэмитиэт Эһигини – Варвара Афанасьевна уонна Александр Николаевич 50 сыл бииргэ дьол – соргу аргыстаах дьоһун олоҕу олорбуккутунан, төрөөбүт Сахаҕыт сирин, кини дьонун аар-саарга аатырдыбыккытынан киэн тутта эҕэрдэлиибит! Оҕолоргутугар, сиэннэргитигэр, бары чугас дьоҥҥутугар күн сиригэр баар бары үтүөнү, күөх сыһыаны баҕарабыт! Инникитин да дьоллоох-соргулаах буолуҥ диэн алгыыбыт. Халлааҥҥыт күннээх, тэлгэһэҕит сибэккилээх буоллун, күөх сирэм күннээтин, сайаҕас салгын саба куустун! ДОМ! ДОМ! ДОМ!

Түөрт Бүлүү экологтарын ааттарыттан “Бүлүү” кэмитиэт бэрэссэдээтэлэ Еремей Чиряев. 2022 сыл, олунньу 19 күнэ. Бүлүү куората.