ВЕРТОЛЕТ” КИИНЭНИ ХАЙААТАР ДА КӨРҮҤ!

Соторутааҕыта соҕус араадьыйаҕа ырыаһыт Лэгэнтэй “Вертолет” диэн ааттаах киинэ устубутун туһунан кэпсээбитэ. Араадьыйабын хойутаан холбооммун биэрии сороҕун эрэ истибитим. Муҥар, ыйытыктаах этим да хоруйдаппатахтара, ол туһунан “Туймаадаҕа” суруйан турабын. Араадьыйаҕа кэпсэтии түмүгүнэн Баатаҕайтан Усуйаанаҕа көтөн испит вертолет саахалын туһунан оҥоһуллубут киинэ курдук өйдөбүл хаалбыта. Маны хайаан да чуолкайдаары анаан оҥостон тиийэн кинотеатрга көрдүм. Сарсыарла 9 чаас 45 мүн. саҕаламмыт сеанска иккиэйэх этибит да, киирсибит киһим сотору тахсан барбыт этэ.

Онон чороҥ соҕотох киинэни көрдүм. Киинэ ити этэр вертолет саахалыгар сыһыана суох эбит эрээри бэйэтэ туспа трагедияны арыйбыт. Мин холобур, “Пугало”, ”Хара хаар” уонна хас да сериаллары көрбүт-билсибит буоламмын интэриэһим улахан этэ. Итилэртэн “Хара хаар” ордук харааһыннарбыта, Хоту дойдубут олохтоохторун ааспат-арахпат проблемалара долгуппута. Оттон Лэгэнтэй бу киинэтинэн төрөөбүт төрүт сирин дьоно бу 21-с үйэҕэ хайдах олороллорун, кыһалҕалара кэм да кыччаабатын туох да киэркэтиитэ суох ыраас мууска ууран биэрдэ.

Манныгы төрөөбүт сирин, онно олорор дьонун дьиҥнээхтик таптыыр, аһынар, кинилэр олохторо тупсуон, кыһалҕалара кыччыан ис сүрэҕиттэн баҕарар эрэ киһи көрдөрүөхтээх диибин. Манна өссө хорсун-хоодуот буолуу ирдэнэрин эбэн этэбин. Сайдыылаах дэнэр 21-с үйэбитигэр үктэнэн олоробут, хайа муҥун бу кыһалҕа хаһан кыайтарарый, эбэтэр төһө өр салҕанан барарый диэн кытаанах ыйытыгы туруорар бу киинэ.

Биһиги дьоммут киинэни устууну илэ-чахчы баһылаан эрэллэрин бу киинэ өссө төгүл бигэргэттэ диэхтээхпин. Бэртээхэй артыыстары талан оонньотуу, устуу маастарыстыбатын баһылааһын сөхпүт санаабар барыта баар, кыаллыбыт. Кылаабынайа олох тыын боппуруостара таарыллыбыттар. Маны барытын тылынан кэпсиир уустук, киинэни уу хараҕынан көрүөххэ, иһигэр киириэххэ, кыттыһыахха наада. Саха дьоно, талааннаах киһи Лэгэнтэй талааннаахтых айбытын хайаатар да көрүҥ, сыаналааҥ диэн ыҥырабын.

Иван БУРЦЕВ 14.03.2022 с.