Бааттаах булчут кимий?
Күнү-күннүктээн хара тыаны кэтэ сылдьар киһи сиэринэн, төрүт саҥата суох эбит. Кураанах мастан уу ыга сатыыр курдук. Хата, “Сахабулт” Томпо улууһугар бэрэстэбиитэлэ, охотовед Василий Габышев булчутун арыаллыы сылдьар буолан, “тылбаастаан” көмөлөстө. Валентин Питкевич – 34 саастаах, биир уол оҕолоох ыал аҕата. Кини аҕатын Виктор Питкевиһи оҕо эрдэҕиттэн батыһа сылдьан булка уһуйуллубут. Василий Васильевич быһаарарынан, Томпо улууһугар “Сахабулт” 1,2 мөл. гектар бултанар сирдээҕэр 58 киһи дуогабардаһан бултуур, ол иһигэр Дьабарыкы Хайаҕа 20 булчуттаах.

“Таас чоҕу хостооботтор, бары тыаҕа сылдьаллар”, — диир. Төрүкү бултанар сирдэрэ буолан, олус харыстыыллар эбит. Киис дэлэгэйэ суох. Кэлбэтэх дьылыгар ытыс соттуохха даҕаны сөп.
Валентин аҕата тыыннаа­ҕар 50 саарбаҕа тиийэ бултуу сылдьыбыттар. Быйыл 7 кииһи бултаабыт. Киистэри эт илиитинэн имэрийэн туппут бэрэстэбиитэл бигэргэтэринэн, бары даҕаны тэҥ үчүгэйдэр, кырымахтаахтар, биир ийэ ууһа олохтоох киистэр буолуохтарын сөп. Арай, ити 2600 долларга атыыламмыт саарбата ураты улахан, хара уонна 70 бырыһыан кырымахтаах эбит. Санкт-Петербурдааҕы аукциоҥҥа 20 устуука Баргузин кииһин тириитинэн анал Топ-лот тэриллибитигэр Дубай (Холбоһуктаах арабтар эмираттара) баайа “Сахабулт” кыттыбыт соҕотох кииһин тириитин муҥутуур үрдүк сыанаҕа атыыласпыт. Валентин Питкевич табаарыстара маҥнай «ватсапка» ааҕан баран итэҕэйбэтэхтэр.

“Ама, хайдах 158 тыһ. солкуобай буолуоҕай, 15 тыһыынчаны бутуйдулар ини”, — дэспиттэр. Онтон булчукка официальнай ыҥырыы кэлбитигэр биирдэ итэҕэйбиттэр, ол иһигэр Валентин Викторович эмиэ.
“Сахабулт” тойоно тылыгар турда

“Сахабулт” концерн салайааччыта Михаил Павлов күһүн булт сезона саҕаланарыгар: “Хамыыһыйа дуогабарын түһэрсибит булчуттарга биир киис тириитин маҥнай 2,5 — 3-түү тыһ. солк. атыылаһыахпыт, онтон аукциоҥҥа атыыга барбыт сыанатыттан бырыһыан тутан баран, эбии төлөһүөхпүт”, — диэбитэ. Михаил Михайлович этэринэн, хамыыһыйа дуогабарын Алдан, Томпо булчуттара эрэ тэрээһиннээхтик түһэрсибиттэр. Аукциоҥҥа Саха сирин кииһэ ортотунан 100 долларга атыыга барбыт. Ити иһигэр 10-нуу долларга турбут сырдык өҥнөөх киистэр эмиэ бааллар. Баргузин киистэрэ ордук сыаналаналлар (ортотунан 121,05 доллар). Холобурга, В.Питкевич атын саарбалара 150-тан 400 долларга тиийэ сыаналаммыттар. “Былырыыҥҥыны кытта тэҥнээтэххэ, киис сыаната улааппата, доллар кууруһа үрдээбитинэн эрэ улааппыт курдук көстөр”, — диир генеральнай дириэктэр итиэннэ мантан инньэ хамыыһыйаламмыт эрэ киис тириитин аукциоҥҥа таһаарар буолуохтарын этэр.

“Гуманнай” хапкаан туһунан “номох”

Эрдэ Үөһээ Халыматтан община хотунун кытта кэпсэтэ сылдьыбыппар, булчуттара “гуманнай” хапкааны сирбиттэрин эппитэ: Саха сирин тымныытыгар дьүөрэтэ суох, кэбирэх, булдун ыытан кэбиһэр диэн. Томпо булчута Валентин Питкевич сыаналаах кииһин “гуманнай” хапкаанынан хаптарбытын кэпсиир (оннук “номох” тарҕанара үөһэттэн ирдэниллэр даҕаны буоллаҕа) уонна кииһин харчытын “гуманнай” хапкааны атыылаһарыгар (1 хапкаан сыаната – 270 солк.) туттар былааннааҕын этэр эрээри, таайтарыылаахтык мүчүҥнүүрүттэн сэрэйдэххэ, сиикэй соҕус быһыылаах…

Ааптар хаартыскаҕа түһэриитигэр: «Сахабулт» концерн генеральнай дириэктэрэ М.М.Павлов бааттаах булчут В.В.Питкевичтиин.
Василий НИКИФОРОВ.