Холуобунай дьыала саҕаланарыгар улахан «өҥөлөөх» дьоннорунан урукку президент В.Штыров, вице-премьер В.Грабцевич онтон да үлүгэр дуоһунастаа - 10 Октября 2011

Main » 2011 » Алтынньы » 10 » Холуобунай дьыала саҕаланарыгар улахан «өҥөлөөх» дьоннорунан урукку президент В.Штыров, вице-премьер В.Грабцевич онтон да үлүгэр дуоһунастаа

Холуобунай дьыала саҕаланарыгар улахан «өҥөлөөх» дьоннорунан урукку президент В.Штыров, вице-премьер В.Грабцевич онтон да үлүгэр дуоһунастаа	09:22
Өрөспүүбүлүкэ бизнес-элиитэтин туоратарга ким интэриэстээҕий? «Чуолаан, маннык ыйытыыга хоруй буларга силиэстийэ ыытыахха наада», -- диэн адвокат Михаил Петров суукка эппит тылын ис хоһоонун тиэртэххэ ситигирдик. Афанасий Максимов, Игорь Чикачев, Игорь Пахомов утары түөрт сылы быһа тэриллибит холуобунай дьыала истиитэ тиһэх түһүмэҕэр тиийэрэ буолла. Инчэҕэй эт илистэр, куҥ эт чарааһыыр уһун-киэҥ дьыла-күнэ диэтэҕиҥ. Балаҕан ыйын 3 күнүгэр, суут истиитигэр, буруйдуур өрүт кэнниттэн тылы адвокаттар ыллылар. Кинилэр, бары кэриэтэ (5 киһи), дьыала «сакаастаммытын», бизнестэн конкурены туоратарга сорунуллубут дьайыы быһыытынан, ким көнөтүнэн, ким таайтаран сыаналаата. 45 туом тухары мунньуллубут холуобунай дьыала ис хоһоонун кылгастык билиһиннэрэр эбит буоллахха: Максимов, Чикачев, Пахомов, Рожин «Саханефтегаз» ААО «Талакаан-Витим» турба ситимин тутуутугар анаабыт – 198 мөл. 300 тыһ. солкуобайын «Якол» САО туһатыгар «арастарааталаабыттар» (160 ыст. 4 ч.); «Якутгазпром» ААО иннигэр «Саханефтегаз» ААО дебиторскай иэһин 293 мөл. 716 тыһ. 450 солк. атыылаабыттар (201 ыст. 2 ч.); «Саханефтегаз» ААО нолукка иэһин 14.908.852 солк. төлөөбөтөхтөр (199-2 ыст.). *«Талакаан-Витим» турбата, нуой саҕанааҕы тутуу. Өссө Юрий Кайдышев правительство бэрэссэдээтэлинэн олорон, ханнык эрэ байыаннай чаастан быстах туттулларга ананан оҥоһуллубут турбаны аҕалан таҥмыттара. «Ничто не постоянное, как временное» диэн бэргэн этии кэриэтэ, ол турба улахан экологическай саахал тахсыар диэри (2006 сыл, ыам ыйа, Ленскэй улууһа) үлэлиир. Саахал тахсыбытын кэннэ өрөспүүбүлүкэ президенин, правительствотын таһымыгар быһаарыы ылан, саҥа турба ситимин тардыытын 2007 сылга «Саханефтегаз» ААО үбүн суотугар сөргүтэргэ дьаһайаллар. Ол иннинэ (туоһу Игорь Корнев «Сахатранснефтегаз» урукку гендириэктэрэ көрдөрбүтүнэн) стационарнай турба ситимэ «Саханефтегазка» үп көһүннэҕинэ тутуллар, үп суох буоллаҕына тутуллубакка турбут. Биллэн турар, босхо ким үлэлиэн баҕарыай, генподрядчигынан үлэлии сылдьыбыт кэлии хампаанньа төлөммөт хамнас туһуттан «Саханефтегаһы» кытары бурайсар. Ол иһин правительство сорудаҕынан тутууну тэтимирдэр кэпсэтии барбытын кэннэ, «Ленагаз» АО иэһэ-күүһэ суох «Ленанефтегазстрой» ХЭТ диэн самалык тэрилтэни тэрийэр. «Ленанефтегазстрой» «Саханефтегаһы» кытары дуогабар түһэрсэр уонна генсакаасчыт быраабын ылар. «Ленагаз» Игорь Корнев бас билэр тэрилтэтэ, «Ленанефтегазтсрой» Корнев этии киллэрэн, кини быһаарыытынан тэриллибит. Суукка буруйдуур өрүт Максимовтаах Чикачев «харчы сиэри анаан-минээн бу тэрилтэни тэрийбиттэр» диэн кэбиэлиий кэйэ турар. Корнев суукка Москубаттан илэ бэйэтинэн кэлэн «мин тэрийбитим» дии турарын тоҕо эрэ ылыммат. «Ленанефтегазстрой» гендириэктэринэн ол иннинэ «Яколга» НГК, «Якутгазпромҥа» үлэлээбит, ньиэп-гаас объектарын тутуутугар анал үөрэхтээх киһини – Игорь Пахомовы аныыллар. Буруйдааччылар «тоҕо чуолаан Пахомов анаммытын» быһааралларыгар сыралара-сылбалара баранна: «Соруйан сиэри-аһаары оҥостон бэйэ киһитин анаабыттар» диэн. Адвокаттар, сууттанааччылар даҕаны «Дьокуускай кыра, Саха сиригэр ньиэп-гаас эйгэтигэр үлэлиир дьон бэйэ-бэйэлэрин бары билсэллэр» диэн этэллэрин эмиэ ылымматтар. Хайыахтарай, халыҥ омук дьоно бэйэ-бэйэлэрин билсэр кыахтара кырдьык суох. Онон аҕыйах ахсааннаах омук «норуотун сирэйин» ааҕа билэрин өйдөөбөт да буолуохтарын сөп. * Биирдэрэ – «Ростехнадзор бэйэтинэн кэлэн хонтуруоллаабыта, бэрэбиэркэни ыыппыта» диэн, аны хаачыстыбатыгар иҥнибиттэригэр этэллэр. Иккистэрэ -- «судэкпсертизэ куһаҕаннык тутуллубутун дакаастаабыта» дииллэр. Адвокаттар «судэкспертизэни» Максимовтааҕы буруйдуурга интэриэстээх киһи «Саханефтегаз» ААО эмиэ урукку салайааччыта – М.Поляков оҥотторбутун ыйаллар. Поляков бэйэтэ да улахан саарбахтаах киһи, кэлиҥҥи сураҕынан Лондоҥҥа хорҕойоро сылдьара иһиллэр. Максимовы утары дьыала тэрийэ сатаан, Игорь Чикачеву, Игорь Пахомовы хаайа сытан хайдах муҥнаабыттарын суукка даҕаны, прессэҕэ даҕаны кэпсээн тураллар. Дьыаланы силиэстийэлээбит опердар Арбузов уонна Карелин сиэрэ суох быһыыларын сууттанааччылар, кинилэр адвокаттара эмиэ элбэхтик саҥардылар. Буруйдуур да, көмүскүүр да өрүт бэйэ-бэйэлэригэр 1937 сылы үгүстүк «санатастылар». Биллэн турар, биирдэрэ «оннук курдук быһыы-майгы баар» диир, икккистэрэ «1937 сыл буолбатах» диэн мэлдьэһэр. Адвокаттар Михаил Петров, Юрий Гладких, Галина Кузьмина бу дьыала дьиҥинэн, арбитражнай суукка көрүллүөхтээх этэ диир санаалаахтар. Холуобунай дьыала саҕаланарыгар улахан «өҥөлөөх» дьоннорунан урукку президент В.Штыров, вице-премьер В.Грабцевич онтон да үлүгэр дуоһунастаах дьон ахтыллаллар. Буруйдуур өрүт тылын-өһүн иһиттэххэ, барыта оҥорон көрүү. «Маннык чыыһылаҕа көрсүбүт буолуохтарын сөп», «санаабыт, соруммут, былааннаабыт буолуохтаахтар» диэннэрэ аһара үгүс. Юрий Гладких «толкуйдаан, оҥорон көрүүгэ буруй олоҕуруо суохтаах, буруй – дакаастаныахтаах» диир тыла сууттан-сокуонтан ыраах да киһини ылыннарыах кэриҥнээх. Кыратык да саарбахтааһын баар буоллаҕына, киһи буруйа суоҕунан ааҕыллыахтаах. Сокуон дьайар күүһүн туттар боломуочуйалаах судьуйа Степан Попов ону хайдах ылынан бириигэбэри таһаарара буолла, биллибэт. Үгүс киһи бириигэбэр эрдэттэн суруллан, остуол быарыгар «хаһаанылла» сытарыгар кыратык да саарбахтаабаттар. Онон, адвокат Петров: «Национальнай бизнес-элиитэни туоратарга ким интэриэстээҕий?» -- диэн ыйытыытыгар, соторутааҕыта суруналыыс Сур «Тыл бэриллэр Икки төбөлөөх Өксөкү кыылга!» («Кыым», 2001 с., балаҕан ыйын 29) диэн суруйуутугар харда иһиллэр курдук: «Конкуренцияҕа утарсааччыгын самнарыахтааххын, кини оннугар эн эрэ баар буолуохтааххын. Ырыынагын ылыахтааххын, бары өттүнэн «тэпсиэхтээххин», төһө кыалларынан эйигин кытта аны хаһан да «конкуренцияласпат» оҥоруохтааххын». Дьиикэй ырыынак кэнниттэн дьиикэй хапытаал үйэтин тыйыс сокуона оннук омсолоох буоллаҕа. (Кыым.ру - 08.10.11)
Views: 1429 \| Added by: uhhan2

Total comments: 0

Only registered users can add comments.
[ Registration | Login ]

Сонуннар күннэринэн

« Алтынньы 2011 »
Бн	Оп	Сэ	Чп	Бт	Сб	Бс
					1	2
3	4	5	6	7	8	9
10	11	12	13	14	15	16
17	18	19	20	21	22	23
24	25	26	27	28	29	30
31

Көрдөө (поиск)

Атын сирдэр

Create your own site

Ааҕыылар

Баар бары (online): 5

Ыалдьыттар (гостей): 5

Кыттааччылар (пользователей): 0