| News topics |
|
Политика.Митинги. Пикеты. Партии
[900]
|
|
Мысли. Думы.Мнения, обсуждения, реплика, предложения
[261]
|
|
Суд-закон.МВД.Криминал
[1279]
|
|
Право, закон
[323]
|
|
Экономика и СЭР
[839]
|
|
Власть Правительство Ил Тумэн
[1207]
|
|
Мэрия, районы, муниципалитеты
[398]
|
|
Мега пректы, планы , схемы ,программы. ВОСТО
[215]
|
|
Сельское хозяйство,Продовольствие. Охота и рыбалка
[553]
|
|
Энергетика, связь, строительство.транспорт, дороги
[154]
|
|
Коррупция
[862]
|
|
Банк Деньги Кредиты Ипотека Бизнес и торговля. Предпринимательство
[291]
|
|
Социалка, пенсия, жилье
[276]
|
|
ЖКХ, строительство
[132]
|
|
Образование и наука. Школа. Детсад
[215]
|
|
Люди. Человек. Народ. Общество
[221]
|
|
АЛРОСА, Алмаз. Золото. Драгмет.
[669]
|
|
Алмазы Анабара
[161]
http://alanab.ykt.ru//
|
|
Земля. Недра
[240]
|
|
Экология. Природа. Стихия.Огонь.Вода
[375]
|
|
СМИ, Сайты, Форумы. Газеты ТВ
[154]
|
|
Промышленность
[43]
|
|
Нефтегаз
[284]
|
|
Нац. вопрос
[284]
|
|
Соцпроф, Совет МО, Общ. организации
[65]
|
|
Дьикти. О невероятном
[183]
|
|
Выборы
[661]
|
|
Айыы үөрэҕэ
[92]
|
|
Хоһооннор
[5]
|
|
Ырыа-тойук
[22]
|
|
Ыһыах, олоҥхо
[102]
|
|
Култуура, итэҕэл, искусство
[365]
|
|
История, философия
[237]
|
|
Тюрки
[76]
|
|
Саха
[152]
|
|
литература
[41]
|
|
здоровье
[463]
|
|
Юмор, сатира, критика
[14]
|
|
Реклама
[7]
|
|
Спорт
[121]
|
|
В мире
[86]
|
|
Слухи
[25]
|
|
Эрнст Березкин
[88]
|
|
Моё дело
[109]
|
|
Геннадий Федоров
[11]
|
|
BingHan
[4]
|
|
|
Main » 2013 » Олунньу » 10 » Мэхээлэ ЭЭБИРИСТЭП аҥаар атаҕа Кэбээйигэ үктэннэ... Владимир ПРОКОПЬЕВ Ньурбаҕа төннөр дуу, эбэтэр Ольга ФЕДОРОВА дуу?
Мэхээлэ ЭЭБИРИСТЭП аҥаар атаҕа Кэбээйигэ үктэннэ... Владимир ПРОКОПЬЕВ Ньурбаҕа төннөр дуу, эбэтэр Ольга ФЕДОРОВА дуу? | 15:53 |
Сунтаар "сулустара"
Воскресенье, 10 Февраля 2013 10:01. Эверстов Кэбээйигэ "илэ Таҥара" эбит буоллаҕына, Сунтаар "Таҥаратын табата" - АКИМОВ.
Ааrtyk.Ru, балаҕан ыйын 8-гар тэриллиэхтээх быыбардарга кимнээх кандидатынан туруох курдуктарын тургутан көрүүнү салгыыр.
Сунтаардар барахсаттар быыбарга кыттыах айылаах "сулустара" кырыы-кырыытынан: алмаасчыттан саҕалаан суруналыыска тиийэ сырдыргыы кытыастар биллэр-көстөр дьонноохтор.
Ил Түмэн быыбарыгар Сунтаар уокуругуттан кимнээх турар баҕалаахтара син биллэр эрээри, бу дьон бары ыарахан ыйааһыннаах политик киирсэрин-киирсибэтин мыҥаан олороллор.
Үйэтин-сааһын тухары республика салалтатыгар үлэлээбит, вице-президеҥҥэ тиийэ үүнэн баран Москваҕа бастайааннай бэрэстэбиитэлинэн "көскө" ыытыллыбыт - Александр АКИМОВ Ил Түмэҥҥэ депутаттыы кэлэр баҕатын туһунан кэпсээн тарҕаммыта ыраатта. Эверстов Кэбээйигэ "илэ Таҥара" эбит буоллаҕына, Сунтаар "Таҥаратын табата" - АКИМОВ.
АКИМОВ салалтаҕа үлэлээбитин тухары төрөөбүт дойдутугар оскуолаҕа, стадиоҥҥа, дьиэҕэ-уокка, балыыһаҕа тиийэ тутууну ыыппыт улахан өҥөлөөх киһи. Кими да кытары утары киирсэн атааннаспат майгылаах буолан, дойдутугар улахан аптарытыаттаах. "АКИМОВ киирсэр буоллаҕына, туһа суох", - диэччи кандидаттар баһаамнар.
Александр Константинович, Ил Түмэн депутатын мандатыттан тирэнэн, салгыы Госдума депутатын мандатыгар талаһыахтаах диэн сабаҕалыыллар.
***
Сунтаартан төрүттээх иккис улахан "сулус" - Матвей ЕВСЕЕВ, "Анаабыр алмаастара", "Нижне-Ленскэй" ААО генеральнай дириэктэрдэрэ.
Матвей ЕВСЕЕВ кэлиҥҥи кэмҥэ олус элбэхтик телевизорга, араас мероприятиеларга кыттар буолла. Тор курдук бытыктаах, сыаналаах көстүүмнээх, дьоһун толкуйу тобула олорор киһи уобараһын күөх экран сылайбакка сыбыыр. Мин сөбүгэр туустанара ордук этэ.
Матвей ЕВСЕЕВ ол эрээри төрөөбүт Сунтаарыттан киирсибэт, Анаабыртан барар диэн этэллэр. Санатар эбит буоллахха, кини билигин Ил Түмэҥҥэ Өлүөхүмэттэн (ол иннинэ Спасскай уокуругуттан) депутат. ЕВСЕЕВ ханна да турбутун иһин (сиэри таһынан кэмин иннинэ уобараһын улуутуппатаҕына) куолас хомунар кыахтаах: харчылаах, былааска бакаа сыстаҕас-сымнаҕас, дьүһүнүнэн да сирдэрбэт.
***
Төрдүс төгүлүн Ил Түмэн депутатын значогун, киэбэ биллибэт бинсээгэр анньыммыт, Александр УАРОВ, биллэн турар, бэһистээн эмиэ Ил Түмэҥҥэ эргиллиэҕин баҕарар... Үөһээ тыынабыт уонна ааһа барабыт. Ол быыһыгар санатар эбит буоллахха, УАРОВ билиҥҥи Ил Түмэҥҥэ аграрнай партия испииһэгинэн киирэн олорор.
Сунтаардар билиҥҥи депутаттара - Семен БЕРЕЗИН, "Сахамедстрах" генеральнай дириэктэрэ депутаттаабыта 10 сылтан орто. Ааспыт 2008 сыллааҕы Ил Түмэн быыбарыгар 200 куолаһынынан Игорь ПАХОМОВЫ куоһаран кыайбыта. Кыайыылаах 200 куолас туһунан сир саарбах сурахтар бааллар эрээри, БЕРЕЗИН кыайбыта.( Бу сырыыга кыттыбаппын диирэ иһиллэр. у.)
Игорь ПАХОМОВ - Сунтаар уола, аҕата Иннокентий ПАХОМОВ дойдутугар тыла олус ыйааһыннаах дииллэр. ПАХОМОВ - "Максимов дьыалатын" биир фигурана. ПАХОМОВ балаҕан ыйыгар диэри этэҥҥэ буоллаҕына, быыбарга кыттарга баҕаран туруон сөп.
***
Сунтаар "сулустарын" кэккэтигэр киирсэр - Жанна ЕГОРОВА, "Сиэрдээх Арассыыйа" көхтөөх чилиэнэ. ЕГОРОВА Сунтаар уокуругуттан Ил Түмэҥҥэ киирсээри сылдьара иһиллэр. Хирург идэлээх Жанна Эдуардовна, бастаан, Сунтаар сэлиэнньэтин баһылыгын быыбарыгар кыттан политикаҕа сүрэхтэммитэ. Сүрэхтэнии суттаһааһыннаах, айдааннаах буолбута.
Онтон былырыын улуус баһылыгар киирсэ сылдьыбыта. ЕГОРОВА Сунтаарга халбаҥнаабат электораттаах, онон ол дьон кини кэлэрин күүтэллэр. Кини Ил Түмэҥҥэ биир мандаттаах уокуруктан киирсибэтэҕинэ даҕаны, партиятын испииһэгинэн парламеҥҥа ааһар санаалааҕа иһиллэр.
***
Уран тыллаах, уот куттаах УХХАН Уйбаан Сунтаарын дойдутун тургута барыаҕын баҕарталыыр. "Баҕар, Ньурбаттан туруоҕа", - диэн билэр киһи сибис гынар. "УХХАН" диэтэххэ кубарыс гынар былаас партията айдааннаах бэйиэти, суруналыыһы Ил Түмэҥҥэ турарын түһээн да көрдөҕүнэ, уһуктубат уутугар үргүлдьү түһэр ини...
***
Ааrtyk.Ru
Мэхээлэ ЭЭБИРИСТЭП аҥаар атаҕа Кэбээйигэ үктэннэ...
Воскресенье, 10 Февраля 2013 00:09
Мэхээлэ ЭЭБИРИСТЭП аҥаар атаҕа Кэбээйигэ үктэннэ...
Aartyk.ru Кэбээйи уонна Үөһээ Дьааҥы улууһун баһылыктара бэйэлэрин быыбардыыр уокуруктарыттан Ил Түмэҥҥэ депутакка кандидат "булбуттарын" туһунан суруйан турар. НОГОВИЦЫН, этэргэ дылы, "фактурата" үчүгэй: бааһынай, модьу-таҕа уҥуохтаах-арҕастаах уонна сахалыы (олуттаҕас соҕустук да буоллар) саҥарар, олохтоох Кэбээйи (Сангаартан төрүттээх), үөһээ салалтаҕа "һээн" дэнэр эдэрчи киһи.
Онон, биир Дьааҥы нэһилиэгин баһылыга эппитинэн, "дьахталлар уулла-уулла талыахтарын" сөп.
Ол да буоллар, дьааҥылар НОГОВИЦЫНЫ өссө тала сыһыа эбит буоллахтарына, кэбээйилэргэ биир аатырар киһилэрэ кэлэн быыбар хаартытын үлтү ытыйар кутталлаах. Ол - уол оҕо одьунааһа Мэхээлэ ЭЭБИРИСТЭП.
Вячеслав ШТЫРОВ Уһук Илиҥҥэ улахан бартыбыалы лөглөччү кыбыммытынан кэлэн эрэр. ШТЫРОВ президенниирин саҕана охсор-тэбэр илиитэ буола сылдьыбыт оччотооҕу Госдума депутата Мэхээлэ Ылдьыыс төрөөбүт Кэбээйититтэн Ил Түмэн быыбарыгар кыттаары күөрэс гыныахча буолла.
Урут ЭЭБИРИСТЭПКЭ көмөлөһөөччүнэн сылдьыбыт, билиҥҥи Ил Түмэн депутата (ЕР испииһэгинэн) Оксана ВИНОКУРОВА Оруһуоспаттан саҕалаан Кэбээйигэ сыбыытаата. Көрсүһүүлэри тэрийдэ, аны саас республика таһымнаах тэрээһиннэргэ кыттар диэн биллэрии тилигирээн таҕыста.
ВИНОКУРОВА урукку тойонугар Кэбээйи быыбарынай буорун нүөлсүтэ сылдьарын сэрэйиэххэ сөп. ШТЫРОВ Москубаттан бэтэрээ эҥээргэ кэлэр буоллаҕына, эрэллээх саллаата - Мэхээлэ эрэт тапталлаах президенин кэнниттэн тилэх баттаһара сабаҕаланар.
***
Ааспыт Госдума быыбарын саҕана, Мэхээлэ ЭЭБИРИСТЭП Думаҕа иккистээн депутаттыы бараары, олохтоох "ньыгыллар" ыыппыт праймеризтарыгар кыттыбыта. Аҕыс сылы быһа хаххалыы сылдьыбыт ШТЫРОВА суох буолан тус сананыытыгар эрэ эрэнэн киирсэ сатаабыта.
Бастаан Москубаттан олорон праймеризкэ кэтэхтэн киирсэр. Арай, сырыы аайы Ылдьыыс, аатын испииһэк түгэҕиттэн булан иһэр. Абарар. Дьокуускайга тиргиллэн кэлэр. Мохсоҕолуҥ олох да хаалыах киһи, биир баартыйалаахтарын сүрдэрин баттаан онус миэстэҕэ тахсар. "Барбыккын кытары бар" диэн холдьоҕулла сылдьар киһи онус да миэстэҕэ тахсан туһаммат. Госдумаҕа атын Мэхээлэ депутаттыы барар.
***
ЭЭБИРИСТЭП праймеризкэ кыттарын туораттан көрдөххө биир көрүдьүөс хартыына этэ. Инники эрээккэ сиэбигэр уктан баран дьүдьэх атахтарын тыылыы тэбэн олорунан кэбиһэр. Депутаттар бары (ким да "атаххын ыл" диэн эппэт) кинини ыраахтан тумнан ааһаллар. Наһаа өр тыл этээри гыммыттары сымыйаргыыр - оччоҕо анарааҥҥылара өс хоту ханнан хаалаллар. ОБЭП тойоно буола сылдьан элбиих элбэх депутат аньыытын-харатын биллэҕэ. Ким да кинини утары саҥарбат. Арай, кэнниттэн "наара суохтан, тугу булан ылаары" диэн кыбдьырынан эрэ кэбиһэллэр.
***
ШТЫРОВ эрэллээх эрэтэ республикаҕа да баар эрдэҕинэ, кэлин Москубаҕа да көһөн баран суруналыыстары чуҥкуппат буолара. Эксээмэн туттарыахтаах оҕолор бөртүлүөттэрин күрэтэн бултуу барар диэн, үрдүк сололоох генералы остуоллата олорон сууллары тардан түһэрэн көхсүн көҥүтэ тэбиэлиир диэн...
"Бэһиэлэй" киһини биһиги бэркиһиирбит аанньа, кэбээйилэргэ - үҥэр Таҥара! Онно ханнык халлаантан түспүтүн таайа сатааччылар элбэхтэр. Онон, Ылдьыыс быыбарга турдаҕына, куолаһы хомуйар кыахтаах. Аны, ШТЫРОВЫҤ субу Уһук Илини баһылыы кэлэн истэҕинэ, саллаатын депутатынан талбакка атаҕастаатахха эмиэ биир моһуок тахсар.
***
Биир идэлээхтэрбит "В Якутии.ру" хаһыат суруйарынан, блогердар ааттыыр ЭМИлэрэ, Дьокуускайга кэлэн эрэр эбит. Уол оҕото эрдэттэн сааныылаах айаннаан иһэр: "Казаряны кытары сирэй сирэйгэ көрсүһэн "бэсиэдэлэһэр" баҕалаах. Москуба генералын сиһилии "бэсиэдэлээн" чуут балыыһаҕа киллэрэ сыспытын кэнниттэн, СР ИДьМ-гар дириҥ хорутуулаах бэрэбиэркэ тахсыбыта диэн кэпсииллэр. Онон, Казаряны кытары "бэсиэдэ" кэнниттэн - сутуруктаах проректордардаах ХИФУну бэрэбиэркэ таарыйара дуу...
***
Aartyk.ru
Владимир ПРОКОПЬЕВ Ньурбаҕа төннөр дуу, эбэтэр Ольга ФЕДОРОВА дуу?
Четверг, 07 Февраля 2013 09:57
Туох ааттаах Ньурбаны буулаатылар?!
- Хайыаҥый, "атын баартыйаттан" босхолонуохтарын наада буоллаҕа..
.
"Хайаан да "Аартыкка" тахсыахтаах" матырыйаалы сайтка туруоран баран, редакция корреспондена төлөпүөннүүр: "Ньурба улууһун баһылыга "эсер" Борис ПОПОВ "ньыгыллар" туруорар кандидаттарын быыбарга өйүөх буолбут үһү", - диир.
Онуоха "Сиэрдээх Арассыыйа" баартыйа олохтоох сүбэтигэр төлөппүөннүү сылдьан сурастыбыт: "Киһигит баартыйаттан тахсан эрэр дуу, хайдах дуу?" - диэн. Төлөппүөн нөҥүө: "Ким да баартыйаттан тахсабын диэн этэ илик. Борис ПОПОВТУУН сибээстэһэ турабыт", - диэн дьахтар намыын куолаһа хардарар.
***
"Хайыаҥ этэй?"
Госдума депутата, "Биир ньыгыл Арассыыйа" артиллериятын саамай суоһарыылаах буомбата - Михаил НИКОЛАЕВ анаан-минээн Ньурбаҕа аттанан эрэрин туһунан сонун, айан саҕаланыан иннинэ тарҕаммыта. Бастакы президент срыытын сыала-соруга - балаҕан ыйынааҕы Ил Түмэн быыбарыгар "буору нүөлсүтүү" буолара дьэҥкэ көстөр.
Михаил Ефимович олохтоохтору кытары көрсүһүүгэ "кэлии дьону" тала олороҕут" диэн ыарахан-ыараханнык саҥарталаабыт. Санатар эбит буоллахха, Ньурба баһылыгын быыбарыгар "ньыгыллар" улуус депутаттарын мунньаҕын спикерин - Сергей ЕВСЕЕВ кандидатуратын өйөөбүттэрэ. ЕВСЕЕВ быыбардыыр штабын сорох үлэһиттэрэ, куоластыыр күн иннинэ туора тыллаһан, үгүс дьону өһүргэтэлээн кэбиспиттэрэ. Инньэ гынан, кыайбыт саҕа санана сылдьыбыт "ньыгыл" байыаһа ЕВСЕЕВ "эсер" ПОПОВКА кыайтаран хаалбыта. Кэлин дьон: "Евсеев син биир хотуоҕа дии санаабыппыт... Үөрэтэ түһээри атын киһиэхэ куоластаабыппыт баара, дьиҥнээхтик хотторон хаалла", - диэн соһуйбут дьон тылын элбэхтик истибитим. Онон билигин Ньурбаҕа - "бэйэ-бэйэни үөрэтии" түмүгэ кэлэн турар.
Сергей ЕВСЕЕВ - олохтоох киһи, билигин улууһун мунньаҕын председателэ. Оттон Борис ПОПОВ Ньурбаҕа төрөөбүт буолан баран, Мииринэйинэн, онон-манан үлэлээн баран Новосибирскайга олохсуйбут киһи этэ. Билигин Борис Николаевич Ньурбаҕа олорор, дьиэ кэргэнэ - Новосибирскайга.
Ол иһин Бастакы президент ньурбалары сирэй-харах астаҕа.
Политика - кэпсэтиһии. Арааһа, "ньыгыллар" пресс-релизтэрин кэнниттэн сыаналаатахха, Николаевтаах Попов биир тылы булбуттар быһыылаах. Ол иһин улуус баһылыга Борис ПОПОВ быыбарга "ньыгыллар" кандидаттарын өйүөх буолан "дьон сүргэтин көтөхтөҕө". Оттон баартыйатын устаабын быһыытынан, дьиҥинэн, утарылаһар баартыйатын чилиэнин өйөөн "сүргэни көтөҕөр" эбээһинэһэ да, бырааба да суоҕа буолуо ээ.
Манан диэн эттэххэ, илэ Таҥара курдук сананар, сананыллар киһи кэлэн: "Хайыаҥ этэй?" - диэн хараҕын утары көрөн туран токкоолоһо турдаҕына, баһылык да буоллар хайыа этэй?
...Сатахха, ПОПОВ, бу быыбар иннинэ сыыһа дьаһанан - улууска ытыктанар оскуола дириэктэрин ууратан кэбиһэн аҕыс араллааны түһэрбитэ.
***
Владимир ПРОКОПЬЕВ төннүүтэ
Ньурба улууһун быыбардыыр уокуругуттан Ил Түмэҥҥэ "ньыгыллар" улуус урукку баһылыгын - Владимир ПРОКОПЬЕВЫ туруоран эрэллэр диэн сонун киирдэ. ПРОКОПЬЕВ билигин "Центрлес" ГАУ салайааччытынан үлэлии сылдьар. ("Центрлес" урукку салайааччыта Александр НОГОВИЦЫН дуоһунаһыттан, балтараа сыллааҕыта этэ дуу, холуобунай дьыала тэриллэн тохтотуллубута).
Владимир ПРОКОПЬЕВ урут СР Баайга-дуолга миниистирин солбуйааччытынан үлэлээбитэ. Онтон оччотооҕу президент В.Штыров "көрдөһүүтүнэн" алмаастаах провинция улууһун салайа барбыта.
Кини иннинэ улууһу Роман ДМИТРИЕВ салайан олорбута. ДМИТРИЕВ "бастакы коррупционер-миниистир" аатын ылан тыа хаһаайыстыбатын министиэристибэтиттэн холдьоҕуллубута, билигин Дьокуускайдааҕы көтөр фабрикатын салайар.
Владимир ПРОКОПЬЕВ Ньурба улууһун баһылыгынан олордоҕуна, олохтоохтор наар "баһылыкпыт дистанционнай, Дьокуускайтан ууна сылдьан үлэлиир" диэн хомуруйаллара. Улуустан барарын саҕана нэһилиэнньэ харыһыйан ытыы-соҥуу хаалбатаҕа. Барыахтаах киһи барбытын курдук ылыммыта.
Ол киһибит билигин төннөн Ил Түмэн депутатыгар кандидатынан туран эрэр эбит. ПРОКОПЬЕВ Ил Түмэн 2-с ыҥырыылаах мунньаҕар 22-с нүөмэрдээх Куочай (Ньурба) уокуругуттан депутаттыы сылдьыбыттаах, бэл "Депутат Болуодьа" диэн хос ааттаах этэ.
***
Ольга ФЕДОРОВА?
"Сиэрдээх Арассыыйа" баартыйа Ньурба уокуругуттан "Якутскэнерго" АК генеральнай дириэктэрин солбуйааччытынан үлэлии сылдьан баран былырыын ууратыллыбыт Ольга ФЕДОРОВАНЫ туруоруох курдук диэн сонун баар. ФЕДОРОВА билигин Ил Түмэн депутата, "СР" депутаттарын фракциятын салайааччыта. Ньурбаҕа 1962 сыллаахха төрөөбүтэ, Ньурба авиаэтэрээтигэр, хомсомуолга үлэлии сылдьыбыта.
ФЕДОРОВА парламеммыт биир саамай толкуйдаах, өйдөөх депутатын ахсааныгар киирэр диэн этэллэр. "Сөптөөх" баартыйалааҕа эбитэ буоллар, улааппыта-үрдээбитэ быдан буолуох этэ диэн билгэлээччилэр бааллар.
***
Онон, Ил Түмэн быыбарыгар Ньурбаттан кимнээх кытталлара биллэн эрэр. Салгыы балаһыанньа туох-хайдах буолуоҕун кэтээн көрүөхпүт.
***
Аартык.ру
|
|
Category: Выборы |
Views: 1647 |
Added by: uhhan1
|
|
|
| Ааҕыылар |
Баар бары (online): 1 Ыалдьыттар (гостей): 1 Кыттааччылар (пользователей): 0 |
|
